2017 ий теле (декабрь) тылзын 22-шо кечынже 60 ий наре ялозанлыкыште пашам ыштыше Романов Арсений Ивановичлан Йошкар-Оласе илыме пӧртыштыжӧ (Гагарин урем, 7-ше №-ан пӧрт) шарнымаш оҥам почмо.

Романов Арсений Иванович Марий Турек селаште 100 ий ончыч, 1917 ий 19 декабрьыште, шочын. Марий Турек районысо Ленин лӱмеш колхозын председательже, «Семёновский» совхозын тӱҥ агрономжо лийын, Медведевысе ялозанлык управленийым, «Шойбулакский» совхозым вуйлатен. Тудым Ленин орден, «Трудовой Йошкар Знамя» орден да кум медаль дене наградитленыт. РСФСР-ын сулло агрономжо. Паша корныжым марий пӧръеҥ 1935 ийыште агроном-семеновод семын тӱҥалын, а 1953 ийыште Марий АССР-ын ялозанлык министрын алмаштышыже лийын. Марий АССР-ысе кугыжаныш семенной инспекцийым 22 ий вуйлатен (1972-1994).

Пенсийыш лекмекыжат, 83 ияшыж марте, кажне ийын шочмо районышкыжо уржа-сорла да ӱдымӧ жапыште миен коштын, шке опытшо дене палдарен. Арсений Иванович – ялозанлыкым вияҥдыме, семеноводство шотышто, тыгак Нартас техникум нерген икмыняр книган авторжо. «Страницы истории земледелия Марийского края» (2001). Пытартыш «Автобиография» книгажым колымыж деч арня ончыч возен пытарен. Тудым тунемшыже-влак савыктен луктыныт. Книгаште авторын илышыж нерген огыл, а республикыште ялозанлыклаште шуктымо паша нерген ойлалтеш.

Шарнымаш оҥа лӱмеш чумыргышо-влак ончылно эн ончыч Марий Эл Республикын ялозанлык да продовольствий министр Гречихо Александр Анатольевич ойлен. А оҥам Арсений Ивановичын Сергей эргыж ден Олеся уныкаже почыныт. Каласыман: Романов Арсений Иванович ныл эргым ончен куштен, ныл уныкажым да ныл уныкажын икшывыжым ужын шуктен. Родо-тукым лӱм дене поро шомакым МарКУ-н профессоржо Соловьёв Виктор Степанович каласен. Тыгак агропромышленный комплексын ветеранже-влакат мутым налыныт, пасулан, ӱдымӧ да нӧшмым ыштыме пашалан, чумыр мланде сомыллан ӱшанле улмыжым ойленыт.