5 майыште Йошкар-Ола деч 30 наре километр деч тораште, Сосновый бор посёлко деч тораште огыл йӱлышӧ чодыра кумдыкышто, Талешке аллейым шындыме. Тудо Марий калыкын икымше погынжылан 100 ий теммылан да Экологий идалыклан пӧлеклалтын ыле.
Акцийыш толшо-влак ончылно эн ондак мутым Советский район гыч онаеҥ Зиновий Столяров налын. Тудо, тичмаш киндым кучен, талешке-влакым чапландарыме пашан кӱлешлыкше нерген ойлен да поро пашам шукташ сугыньым пуэн.
Пушеҥгым шындаш «Кугарня» ден «Ямде лий» газет-влакын, Марий тӱвыра рӱдерын, М.Шкетан лӱмеш театрын пашаеҥышт, Мер Каҥашын, Марий национальный конгрессын, «У вий» да «Саскавий» ушем-влакын еҥышт лектыныт. Тышке Марий Эл Республикысе тӱвыра, печать да национальность паша шотышто министр Михаил Васютин, Чодыра да сонар озанлык министр Алексей Шургин, Российысе марий-влакын национально-культурный автономийжым вуйлатыше Лариса Яковлева, Оньыжа Эдуард Александров ушненыт. Витле утла еҥ 5 тӱжем утла пӱнчым шынден.
— Ме «Талешке аллей» акцийым Марий калыкын икымше погынжылан 100 ий теммылан пӧлеклаш шонен пыштышна. Тыгак тений Экологийын идалыкше эрта. А шукерте огыл, 26 апрельыште, Марий талешке кечым палемдышна. Ты аллей Чумбылатым, Полтышым, Чоткарым, Акпатырым, Мамич-Бердейым да моло талешке-влакым шарныме лӱмеш лиеш. Тыгак 1917 ий июльышто Ӱпӧ волостьысо Пӱрӧ олаште эртыше икымше марий съездын 200 делегатше-влакат талешке улыт, — палемден Лариса Яковлева.
Марий кундем ожнысекак ужар пӱртӱсшӧ дене ойыртемалтын. Шым ий ончыч ятыр кумдык чодырам «йошкар агытан» пытарыш. А кызыт ты верыште самырык-нӧргӧ пушеҥге-шамыч нӧлталтыт. Ончыкыжым Марий Элын автономийжылан 100 ий теммылан пӧлеклалтше акцийым увертараш палемдыме. Ме огыл гын, кӧ шкенан кундемнам тӱзата?!