Талешке-влакым шарныме декаде тӱҥалын

Марий Элыште коронанавирус шарлымылан кӧра Марий Оньыжа калык деке ӱжмаш дене лектын. Эдуард Васильевич Александров талешке-влакым шарныме декадым 26 вӱдшор гыч 9 май марте эртараш темлен. Тоштыеҥ радамыште улшылан сортам чӱктен, вуйым саваш, илыше талешкылан сотокылым, Интернет йӧн але же теле да радио дене пайдаланен саламлаш.

Талешке-влакым шарныме декадыш Йошкар-Оласе район землячестве-влак ушненыт.

Марий Турек землячествын еҥже-влак кумдан палыме икымше марий академик Василий Петрович Мосоловын бюстшо деке лектыныт.

Шернур марий-влак поэт, икымше марий киноактер Йыван Кырлалан Йошкар-Оласе кӱртньыгорно воктене улшо скульптор композиций ончылан вашлийыныт да тудлан арулыкым пуртеныт.

Морко землячествын еҥже-влак марий классик Сергей Григорьевич Чавайнлан, Йошкар-Оласе тӱҥ каныме паркыште улшо Курымашлык тул ончылан да Совет Союз герой-влаклан пеледышым пыштеныт; тыгак Валентин Христофорович Колумбым да Сергей Николаевич Николаевым пеледыш дене шарналтеныт.

Совет район землячестве лӱм дене Калыкле президент школын директоржо Лидия Геннадьевна Иксанова Аркадий Степанович Крупняков дене вуйым савен гын, курыкмарий землячестве марий композитор Владислав Порфирьевич Куприяновын чапкӱж воктене Марий талешке кечым палемденыт.

Оньыжа Э.В. Александров Волжск кундемын чолга мер да кугыжаныш пашаеҥ Николай Фёдорович Рыбаков да семмастар Иван Степанович Палантайын памятник ончылан марий талешке-влакым шарнен да ыштыме пашаштлан таум ойлен.

У Торъял землячестве шке кундемысе талешкыже-влакын чапкӱшт воктеке 9 агаште лекташ палемден.

Тиде кечынак районлаште марий чолгаеҥ-влак шке кундемысе талешке-влакын шарныктыш чапкӱ-влак деке миеныт.

Оршанке районышто Мамич Бердей деке кидмастар да онаеҥ Виталий Николаевич Кудрявцев, Морко район Унчо кундемыште улшо Онар да Кугу Ачамланде сарыште вуйым пыштыше-влаклан монумент ончылан Унчо ял калык, посёлкышто верланыше Сергей Григорьевич Чавайн деке Мер каҥашын еҥже Анатолий Анатольевич Титов миен коштыныт.