2017 ий пеледыш / июнь тылзын 3-шо кечынже Татарстан Республик Менделеевск район Элнет селаште Семык пайрем эртаралтеш.

Тушко Пошкырт, Удмуртий, Марий Эл да Киров кундемла гыч уна-влак мият. Пайремым эртарыше-влак уна-влаклан корным умылтарат: Алабога ола гыч Ижевск корныш савырнаш, Ижевск ола воктеч эртен кайыме годым «Семык» указательым ончаш темлат.

Элнет тӱвыра пӧртым вуйлатыше Мальгин Геннадий Александровичын мутшо почеш, кугу концерт программым ямдылыме.  Кажне делегаций ик номер дене ончыктышаш, а тылеч шукырак муро-куштымашым кондышо коллектив-влаклан шке мастарлыкыштым ончыкташ вес сценым йӧнештарыме. Тыгак эше кумшо сцене лиеш, туштыжо гармонь почеш але аккапельно муралташ йӧн уло.

Пайремыште кок кугу конкурс эртаралтеш: «2017 ийысе чевер марий ӱдыр» ден «2017 ийысе марий патыр». Тушко 16-24 ияш ӱдыр-рвезе-влак ушнен кертыт. Тӱрлӧ конкурс дене пырля тений кидмастар-влаклан «Мастар ола» манме мероприятий эртаралтеш. Тыште чыла кумылан еҥ кидпашам аклен ончен да налын кертеш.

Семык пайрем годымак онаеҥ-влак кумалтыш йӱлам эртарен колташ шонат. Тидлан лӱмынак пучымышым шолтат. Тудым авызлыме деч ончыч марий йӱла почеш кумалтыш мутым ойлат, Ош Поро Кугу Юмо деч ончыкыжымат марий калыклан келшен илаш йӧным ышташ йодыт.