Марий тиште кече дене кылдалтше мероприятийлашке Мер Каҥашын еҥже-влак миен коштыныт але шкештак эртарен колташ полшеныт. Теве Медведево гимназийыште марий йылме ден ИКН предметлам туныктышо, Мер Каҥаш еҥ Римма Ивановна Чендемерова кугу пашам шуктен.

Тушто Марий тиште кечын 15 ияш лӱмгечыжлан пӧлеклалтше посна урок-влак эртеныт. Тыге кугарак класслаште тунемше-шамыч изирак йолташыштлан икымше книга, букварь, сылнымут, шанче паша дене палдарыше урокым эртареныт.

Тунамак почеламутым сылнын лудмаш конкурс лийын. Ӱдыр-рвезе-влак пырдыжгазетым сылнештареныт.

Пайрем кече концерт дене иктешлалтын.