Тыге маналтын «Саскавий» ушемын 8 Март вашеш кокымшо ий почела эртарыме пайрем концертше. Тудо ӱдырамаш-влаклан пӧлеклалтын ыле.

Пайрем ӱмашсе семынак Марий самырык театрыште эртен. Омсам почат веле – вигак пайрем кумыл шижалтын: сылне марий сем йоҥген, мотор причёскан, тувыран ӱдырамаш-влак коштыныт, а кажныжын чурийыштыже – весела шыргыжмаш. Фойеште пайрем кумылым нӧлташ полшышо «Ах, ӱдырамаш мастарлыклан уке мучаш!..» ончер-ярмиҥга, «Пелед, тӱзлане, пиалан лий, марий ӱдырамаш!» фото-ончер лийыныт.

Пайрем концертыш толшо калыкым шке сӱрет ончерже дене Мардан Рая, самырык сӱретче Алёна Бастракова, тасма ден тӱрлымӧ пашаж дене Светлана Романова, Звенигово районысо усталык пӧрт гыч толшо кидмастар-влак Ирина Чугунова, Людмила Ефремова, Галина Кудрявцева, Оршанке райjнысо Тошто Крешын мастарлык пӧрт гыч Снежана Гаврилова ден Зинаида Волкова, этнодизайнер Евгения Кошкина, Советский районысо Ургаш книгагудын «Гармония» ӱдырамаш клубшым вуйлатыше Эльвира Бастракова, «Энсай» кевытын кевытчыже Марина Степанова шке пашашт дене куандарышт.

Пайрем касым Марий самырык театрын актёржо-влак Игорь Актуганов, Артём Иркабаев, Михаил Александров да мыскараче Сергей Карпов вӱдышт. Концертым пӱтынек пӧръеҥ-влак сӧрастарышт. Сылне мурым муралтымышт деч вара нуно шке шонымышт почеш тӱрлӧ радамыште шинчыше ӱдырамаш-влаклан мотор пеледышым кучыктышт. Мотор ӱдырамаш-влаклан муро саламым колтышт Иван Смирнов, Александр Егошин, Роман Алексеев, Родион Алексеев, «Каче-влак» группо, Шкетан театрын чолга рвезышт да молат. Пайрем концертлан сценарийым писатель Геннадий Гордеев моткоч сылнын возен, кажне ӱдырамашын чонжым тарватен кертын.

Кок ужаш гыч шуйнышо концерт деч вара фойеште «Марий кас» лие. Ӱдырамаш-влакым изирак пайрем ӱстел, пайремышке толшо кидмастар-влакым Таумут, роза пеледыш, тыгак Оньыжа Э. В. Александровын саламлыме мутшо вученыт. Самырык театрын артистше-влак И. Актуганов ден М. Александров мурыктышт, куштыктышт, ӱдырамаш-влакым уло кумылын кандарышт.

Ирина Степанова
Иван Речкинын фотожо

—