2017 ий ага / май тылзын 28-ше кечынже Курыкмарий район Пайскырык / Пайгусово школышто Игнатьев лудмаш эртен. Тудо филологий науко доктор, МарГУ-н почётан профессоржо Лидия Петровна Васикован шочмыжлан 90 ияш лӱмгечыжлан пӧлеклалтын.

Игнатьев лудмаш кажне ийын эртаралтеш. Тений тудо латкшымше гана лийын да «Курыкмарий-влак поликультурный пространствыште» шанче-практик конференций форматыште эртен. Тушко Марий Элысе тӱвыра, туныктыш да науко пашаеҥ-влак деч посна вес кундем гычат участник-влак лийыныт. Чуваш Республик гыч туныктышо, Российысе сымыктыш историйын институтшын аспирантше (Санкт-Петербург), Российысе В.В.Виноградов лӱмеш науко академийын Руш йылме институтшын научный пашаеҥже, Испанийысе Барселона университетын социолингвистике ден коммуникацийым шымлыше рӱдержын пашаеҥже-влак толыныт. Тыгак Германийысе Людвиг-Максимилиан лӱмеш Мюнхен университетын Финн-угор да урал шымлымаш-влакын институтшо гыч Джереми Брэдли участвоватлен. Тудо толын кертын огыл, сандене «Курыкмарий ресурс www.mari-language.com сайтыште» теме дене докладшым видеош войзен колтен.

Ӱжмӧ уна-влак коклаште Марий Эл Республикын президентше Зотин Владислав Максимович, Марий Мер Каҥашын еҥже-влак: Марий Эл Республикым вуйлатышын икымше алмаштышыже, тӱвыра, печать да калык-влак кокласе паша шотышто министр Васютин Михаил Зиновьевич, Курыкмарий районысо депутат-влак погынын председательже Гурьянов Александр Владимирович – лийыныт.

Эн ончыч пленарный заседаний эртен. Тушто куд доклад лийын. Вара лӱмлӧ курыкмарий шымлызе Васикова Лидия Петровналан бюстым Пайскырык школ ончылно торжественно почыныт. Кумылан-влаклан Пайскырык городищыш автобус дене экскурсий темлалтын.

А кечывал деч вара шанче-практик конференций шке пашажым шуен: кандаш секций пашам ыштен, кажныштыже 10-14 доклад дене выступлений лийын. Марий сылнымутын классикше, поэтше, драматургшо да романистше Игнатьев Никон Васильевич (1895–1937) лӱмеш йӱлаш пурышо форумышто курыкмарий йылмыште, сылнымутышто, историйыште, тӱвыраште да образованийыште вашлиялтше нелылык да тушеч лекташ кычалме йӧн-влакым каҥашат. Тиде кугу паша курыкмарий-влаклан национальный шкешамыштым нӧлталаш, марий калыкын поянлыкшым аклаш, йӧраташ да утыр шукемдаш шонымаш дене ышталтеш.