23 сӱремын Киров областьысе Келшымаш пӧртыштӧ марий калыкын тӱвыра, йӱла ойыртемым аралыме да вияҥдыме шотышто йыргешке ӱстел эртен.

Кикнур, Пижанке, Лебяж, Малмыж, Яраҥ, Уржум кундемысе мер пашаеҥышт, верысе калыкле тӱвыра автономийын вуйлатышышт да еҥышт Киров кундемысе кӧргӧ политик министрын алмаштышыже Никитина Ирина Юрьевна, Келшымаш пӧртын директоржо Матанцева Елена Леонидовна дене вашлийыныт. Нуно марий-влакын мер илышыште чолгалыкым ончыктымыштлан таум ойленыт, марий мероприятий-влакым эртарыме годым нелылыкым кораҥдыме шотышто ой-каҥашым пуэныт да грант пашаш кумылын ушнаш ӱжыныт. Лишыл жапыште Киров кундемысе Марий тӱвыра рӱдерыште вашлиймашым эртараш палемденыт.

Погынышо-влак Киров кундемысе марий-влакын советшын пелияш пашажым иктешленыт да ончыкылык ыштышаш пашам радамленыт. Тыгак Советыш пураш Советск олан вуйлатышыже Порубаев Владимир Иванович да Совет олан исполкомжым ондак вуйлатыше Лукоянов Станислав Арсентьевич кумылым ончыктеныт.

Ӱшанена, Советск районыштат марий паша вораҥаш тӱҥалеш.