9-16 июльышто Сӱрем арня эртыш.

Кумдан Сӱрем кумалтыш-влак Морко да Волжск районлаште эртат. Тиде йӱлам Унчо, Шеҥше кундемласе калык шуктат гын, Волжск районысо Корамас калык Сӱрем ужатымашым эртарат. Пытартышыже 16 сӱремын лие.

Волжск районысо «Марий кумалтыш» общинын пашаж дене кумдан палыме лияш да кугезе йӱлам шукташ манын тышке марий онаеҥ-влакат ушненыт.

Морко, Волжск, У Торъял, Марий Турек, Йошкар-Ола гыч толшо онаеҥ-влак «Чоткар патыр» тӱвыра эртык комплексыште Юлсер кундемын патыржылан вуйым савеныт да верысе калык дене пырля Сӱрем ужатымаште лийыныт.

Нунын деке Волжск районысо администраций вуйлатышын алмаштышыже С.В. Сычев, тӱвыра пӧлка вуйлатыше Л.А. Казакова, Корамас ял шотан илем вуйлатыше Б.В. Николаев ушненыт. Нуно верысе общинын пашажым кугун акленыт да ыштыме пашаже калык коклаште кӱлешан ман палемденыт.

«Сӱрем ужатымаш» йӱла лач тиде кундемыште аралалт кодын. «Марий кумалтыш» общинын вуйлатышыже А.А. Федоровын ойлымыж почеш тиде йӱлам кажне ийын шуктат. Онаеҥ-влак пӧртыштӧ погынат, пелештен лекмеке, ял мучко эртат — шып огыл. Нунын ошкылмыштым мӱкш ызген кайыме дене таҥастараш лиеш. Кум еҥын кидыштыже куэ, писте, ваштар укш-влак. Ял покшелне шогышо онапу ончылан (тудым печен ойырымо, кумалтыш кечын капкажым почыт) верысе калык дене пырля кумалтыш эртаралтеш. Онапум калык кум гана эрта, тидын жапыште онапу ончылан кондымо, почыла почыла кум укш вераҥдалтеш, онаеҥ нине пушеҥге-влак семын пеҥгыде, куатле, виян лияш манын калыклан юмо деч йодеш.

Шижалтеш, тиде йӱлам калык чот пагала, садланак кажне ийын калык тышке шукак погына, эсогыл Озаҥ олаште илыше але пашам ыштыше-влакат кугезе йӱлам шукташ ушнат.

Ятыр гана Корамас калык кумалеш гын, йӱр тудо кечын толеш манме шоктен. Садланак тиде гана йӱр лиеш мо манын, ятыр жап шокшо игече шогымо деч вара ятырын вученыт.
Пӱртӱс юмына шуко ыш вучыкто, леве кеҥеж йӱр калыклан уэш куаным кондыш.