2015 ий 1 апрельыште Йошкар-Олаште 22-шо гана «Воштылаш, товатат, сулык огыл» конкурс эртыш. Сеҥыше да чыла участникымат Марий Оньыжа, Марий Эл Кугыжаныш Погын вуйлатышын алмаштышыже Анатолий Иванов саламлыш.

Тений «Воштылат, товатат, сулык огыл» конкурслан куд касым пӧлеклыме. Ончыч тудо Звенигово район Кужмара селыште? Оршаҥге район Тошто Крешыныште, Советский, Шернур, Морко посёлкылаште лийын. Тыгак Пошкырт кундемыште «Чолман» газет эртарен. Конкурсын икымше этапыштыже сеҥыше-влак Йошкар-Олашке толыныт да республике кӱкшытыштӧ моштымашыштым ончыктеныт.

Нуным официальный жюри да почётан еҥ-влак акленыт. Жюрим РФ сымкытышын сулло пашаеҥже Олег Иркабаев вуйлатен.

Тыге кумшо верыш лектыч: Шернур район гыч «Пӧлек» ансамбль мыскара куштымаш дене, Оршаҥге гыч Римма Кудрявцева, Ирина Кудрявцева, Елена Рыбакова «ЭГЕ» сценке дене. Кокымшо вер дене палемдалтыч: Йошкар-Ола гыч Сергей Карпов, Александр Кожевников, Вера Горохова да Оршаҥге гыч Виталий Кудрявцев «Беби-бум» сценке дене. Кокымшо верышкак Советский район Кужмара гыч Вера Мочаева ден Валя Ефремова «Йӧратымашым кычалын» номер дене лектыч. Икымше вер — Советский район гыч Андрей Васильевын марий пародий дене.

А касым мурызо-влак Роза Искакова, Светлана Дмитриева-Осипова, Любовь Орлова, Галина Почелина, Иван Смирнов, Вадим Краснов, Виктор Комаров, Стас Устюгов сӧрастарышт. Тӱрыс программым Вера Горохова ден Александр Кожевников моткоч мастарын вӱдышт.

Автор: Эльвира Куклина.