23 декабрьыште Мер Каҥаш вуйверын черетан погынымашыже лие. Эн ончычак Марий Оньыжа Анатолий Иванов мутым Марий Элысе марий тӱвыра рӱдерым вуйлатыше, Мер Каҥаш вуйвер исполкомын еҥже Валерий Григорьевлан пуыш. Валерий Помбеевич кок йодышым рашемдыш: Тиште кечым республик кӱкшытыштӧ кузе эртарен колтымо да У ийлан пӧлеклалтше мероприятий-влак кузерак эртат.

Тений Марий тиште кече Йошкар-Олаште у семынрак лийын. Тушко толшо ятыр еҥ тудын сай ойыртемжым палемден: тиде — касыште писатель нерген гына огыл, тыгак шымлызе, туныктышо-влак нерген каласкалымаш. Диктантым возышо-влакымат саламлымаш посна ямым пуртен. Вет тиддеч ик кече ончыч 500 наре еҥ марий диктантым рӱж серен. Тыгай шкешотан акцийым Марий кугыжаныш университет эртарен. Ты пашашке Мер Каҥашат, Марий тӱвыра рӱдерат ушненыт.

Ты гана Оласе ёлкат ойыртемалтын: йочасад ден школ-влак чылт марий номерым ямдыленыт. А Республикысе йоча у ий пайремыш кажне район гыч вич чолга ӱдыр-рвезым ӱжыныт. Шкешотан марий ёлко-влак Совет район Ӱшнур, Мари-Турек район Мари-Купта школлаште лийыныт. 6 январьыште Параньга район Усолаште, Мари-турек район Мари-Купташте да 8 январьыште Киров кундем Яранскыште Шорыкйол пайрем вуча.

Тыгак Марий тиште кечылан пӧлеклалтше район мероприятийлашке лектын коштмо нерген Мер Каҥаш вуйверын моло еҥжат каласкалышт. Алёна Иванова Одо кундемыш самырыктукым погынымашке де тусо марий-влакын пленумышкыжо миен коштмо нерген ойлыш гын, Валерий Мочаев Санкт-Петербургысо марий-влак дене лиймыж дене палдарыш.

Анатолий Иванов Морко район Шеҥше селаште тӱвыра пӧрт ончылно Марий облисполкомын икымше председательже Иван Петрович Петровын шочмыжлан 120 ий теме лӱмеш бюстым шогалтыме нерген мутым шуйыш. Тиде бюстым шогалташ поро кумылым ончыктышо концертлаште шийвундым погеныт: 46 800 теҥгем – Морко посёлкышто, 52 320 теҥгем – Йошкар-Олаште. А 19 500 теҥгем активист, предприниматель-влак пуэныт. Нунылан Марий Оньыжа Мер Каҥаш да Морко землячество лӱм дене кугу таум ышта.

А у 2014 ийлан паша план, рушла манмыла, — процессыште. Мер Каҥашын еҥже-влак деч 30 декабрь йотке ешартыш темлымашым электрон почтыш (kuklina-10@mail.ru) изин-кугун вучат. Жап кодын огыл – шуйкалаш нигушко.

Автор: Эльвира Куклина.