2014 ийыште Мер Каҥашын шошо сессийже молгунамсе семын апрельыште огыл, а 27-28 мартыште лиеш да Российын тӱрлӧ регионыштыжо илыше марий-влакын йодышыжлан пӧлеклалтеш. Тидын нерген палемденыт 27 февральыште Мер Каҥаш вуйверын погынымаштыже.

Вуйвер погынымаште икмыняр йодышым каҥашеныт: Марий Турек районысо Мер Каҥаш активын паша лектышыже; Марий Элын районлаште марий йылмым туныктымо паша; Марий форум: шошо сессий, пленумым ямдылыме да эртарен колтымо да молат.

Эн ончычак Марий Турек районысо Мер Каҥаш активын паша лектышыж нерген каҥашеныт. Ты шотышто Мер Каҥашын еҥже Зинаида Батуева докладым ыштен. Тудо тӱҥ шотышто район школлаште марий йылмым тунемме нерген ойлен: тушто 14 школ уло, 436 туныктышо тырша да кок тӱжем утла йоча тунемеш. Кум школышто марий йылмым шочмо йылме семын тунемыт, моло школышто – кугыжаныш йылме семын. Ныл йочасадыште шочмо йылме дене мутланат. Кум школышто татар йылмым да Карлыган школышто одо йылмым тунемыт.

А кокымшо йодыш дене теве мом палемдышт: таче марте Мер Каҥашын еҥже-влак кум школышто – Шернур Лажъялыште, У Торъял Кузнечыште, Марий Турек Сардаляште – лийыныт. Кеҥеж марте чыла районым авалташ да иктешлыше мероприятийым эртараш шонат.

Тыгак Пелеледыш пайрем нерген икмыняр йодышым каҥашышт. Ты шотышто йодыш-влакым оргкомитетыште утларак тӱткын ончаш тӱҥалыт.