Чынак вет, марий мер организаций-влакын тӱҥ шонымашышт икте: марий калыкым арален кодаш да тудым ончыко вӱден лукташ. Ты кугу шонымаш дене кылдалтше пашам Марий калык конгрессат кертмыж семын илышыш шыҥдара. Тудо тӱҥ шотышто историеш мондалдыме кышам кодышо еҥ-влаклан шарнымаш оҥам почмо дене палыме. Тидын нергенак Марий Оньыжа Анатолий Иванов 30 январьыште Марий калык конгрессын иктешлыме-сайлыме погынымаштыже ойлыш да Конгрессын еҥже-влаклан чолгалыкым, паша лектышым тыланыш.

Марий калык конгрессын иктешлыме-сайлыме погынымашкыже 54 еҥ чумырген, нимогай йӱштым ончыде, районла гычат толыныт. Нуным тыгак республикысе тӱвыра, печать да калык-влак паша шотышто министр, Мер Каҥашын еҥже Михаил Васютин саламлыш. Тудо Конгрессын чолга еҥже-влакым посна награде дене палемдыш: Зоя Глушкова ден Виктор Наумовым — тӱвыра министерствын Чап Кагазше дене, Эдуард Александров ден Алёна Ивановам – «Калык верч тыршымаш» медаль дене.

Вара Конгрессым вуйлатыше Эдуард Александров, тергыше комиссийым вуйлатыше Леонид Баширов, Марий-Турек район Конгрессым вуйлатыше Зинаида Батуева, Волжский район Конгрессым вуйлатыше Эльвира Муравьёва докладым ыштеныт. Чылаже ӱмаште Конгрессын счётышкыжо 275 тӱжем теҥге «Марий Элым этнокультурно вияҥдымаш» республикысе целевой программе гоч пурен. Чыла шийвундым палемдыме пашалан кучылтмо: икмынярже Пеледыш пайремым эртараш каен, тыгодымак Мер Каҥашын шошо да шыже сессийжылан ойырымо, ӧрдыж кундемлашке паша дене лекме годым корно роскотым петырыме да молат. Тышеч Марий калык конгрессын пашажат коеш – тудо марий калыкын чыла гаяк кугу мероприятийыштыже участвоватлен.

Иктешлыме-сайлыме погынымаш годым Конгресс вуйлатышылан эше ик ийлан Эдуард Александровымак кодышт. Тудын алмаштышыжлан – исполком вуйлатышылан Эльвира Куклинам сайлышт. Исполкомыш 33 еҥ пурыш. Тергыше комиссий чылт уэмдалте: Геннадий Куликов (Йошкар-Ола), Николай Сидоркин (У Торъял р-н), Сергей Петров (Волжский р-н).

Погынымаш годым посна эше ик йодышым ончышт: Оласе тӱвырам 2020 ий марте вияҥдымаш концепций нерген. Тудым ышташ Марий Эл правительстве пеленсе республикысе кугыжаныш йылме-влак шотышто комиссий Марий калык конгресслан темлен. Ты йодышым виктарен колташ пашаче группым ойырымо: Эдуард Александров, Зоя Глушкова, Василий Ершов, Геннадий Куликов, Валерий Мочаев, Александр Петров, Наталья Пушкина. А моло чолга еҥ-влак шке темлымашыштым 1 март марте пуышаш улыт.

Тыгак погынымаш годым Марий калык конгресс лӱм дене чолга марий еҥ Андрей Чемышевлан «За заслуги перед Республикой Марий Эл» медальым кучыкташ ходатайствым ышташ пунчалыныт.

Автор: Эльвира Куклина.