70 ий ожно Марий Элыштына Калык усталык рÿдер шочын. Тудо таче мыланна Республикысе калык усталык да культурканыш паша шотышто шанче-методик рÿдер семын кумдан палыме да шергын аклыме. Тыгай кÿкшытым лач сай паша дене сулаш лиеш. Тыге, рÿдерын икоян ешыже кызытсе тÿвырам вияҥдымаште, культур пашаеҥ-влакым шуарымаште чот тырша, тÿрлö ийготан еҥ-влаклан кÿлешан мероприятийым эртара. Республикын чыла районжым авалтен, фестиваль, конкурс-влак калыкым иктыш чумырат.

Тендам Россий кÿкшытыштат, финно-угор тÿняштат палат. Тидыже адак ыштыме паша дене кылдалтын. Тыршет – лектыш лиеш, сеҥымашке шуат.

Умбакыжат вияҥаш, шочмо тÿвыранам арален шуараш тыланем. Шÿм-чонда эреак волгыдо, кумылда нöлтшö лийышт. Илыш йолташда-влак – тиде тазалык, пиал, усталык. Тек нуно Тендан пелен илат, корныдам волгалтарат.

Пайрем дене!

Пагален, Марий Оньыжа Э.В. Александров.