Марий Мер Каҥаш 2017 ий пеледыш / июнь тылзыште лӱмгечым палемдыше-влакым саламла:

80 ийым темыше чолга марий еҥ-влакым:

— Першин Илья Биктубаевичым. 1937 ий 5 июньышто Пошкырт кундем Благовещенск район Ӱлыл Изяк / Нижний Изяк ялыште шочын. Поэт. 2004 ийыште «Ойласыше эҥер» книгам савыыктен луктын.

— Васильева Евгения Николаевнам. 1937 ий 26 июньышто Морко район Эҥерӱмбал Шале / Малый Кулеял ялыште шочын. 1988-1994 ийлаште Госпланын АПК пӧлкажым вуйлатышылан ыштен. 1985 ий годсек РСФСР-ын сулло экономистше.

— Иванов Анатолий Александровичым. 1937 ий 13 июньышто Морко район Изи Корамас ялыште шочын. Шернур район Лажъял школышто директорын алмаштышыжлан пашам ыштен. РСФСР-ын сулло туныктышыжо.

70 ийым темыше чолга марий еҥ-влакым:

— Максимов Анатолий Алексеевичым. 1947 ий 17 июньышто Шернур район Тулгем / Тулбень ялыште шочын. Марий Эл Республикын кугыжаныш секретарьжылан пашам ыштен, 1996. 2001-2007 ийлаште Марий Эл Республикысе ялозанлык, продовольствий да пӱртӱс дене пайдаланыме министрын икымше алмаштышыже лийын.

— Рябцева Роза Викторовнам. 1947 ий 1 июньышто Морко район Семисола ялыште шочын. 10 ий Маргосфилармоний пеленысе «Марий Эл» ансамбльын артисткыже лийын. «Марий Эл» ГТРК-ште дикторлан, редакторлан пашам ыштен. 1990 ий годсек Марий Эл Республикын сулло артисткыже.

— Шабруков Азолий Алексеевичым. 1947 ий 11 июньышто Шернур район Кӱльшӧ / Большая Кульша ялыште шочын. ФСБ-н полковникше. Йошкар-Оласе медицине колледжын преподавательже.

— Терентьев Анатолий Андреевичым. 1947 ий 25 июньышто Морко район Акпарс Шӱргӧ / Испаринск ялыште шочын. 1998-2009 ийлаште Озаҥыште илыше марий-влакын национально-культурный автономийыштым вуйлатен. Подполковник званиян.

65 ийым темыше чолга марий еҥ-влакым:

— Баширов Леонид Шакировичым. 1952 ий 24 июньышто Пошкырт кундем Балтач район Торсола / Стародюртюкеево ялыште шочын. 1999-2007 ийлаште Марий Эл Республикын сайлыше комиссийыште лийын. 2001 ий годсек Марий Эл Республике пеленысе Мер-политик рӱдерым вуйлата.

— Смирнов Геннадий Николаевичым. 1952 ий 25 июньышто Звенигово район Какшамарий / Кокшамары ялеш шочын. РФ-се Миграций комитетын Марий Эл Республикысе органжым вуйлатышын алмаштышыжлан пашам ыштен.

— Александров Владимир Сергеевичым. 1952 ий 9 июньышто Киров кундем Малмыж район Мариялыште шочын. Пӱкшэҥер ялысе библиотекым вуйлатен.

60 ийым темыше чолга марий еҥ-влакым:

— Арсланова Валентина Логиновнам. 1957 ий 25 июньышто Морко район Алсола / Алдышка ялыште шочын. Марий Эл Республикысе Калыкым социально аралыме да паша министерствын пенсионер ден инвалид-влак шотышто пӧлкажым вуйлатышын алмаштышыже.

— Одинцов Валерий Ивановичым. 1957 ий 1 июньышто Оршанке посёлкышто шочын. Судышто аралышылан пашам ышта.

— Яндубаев Сергей Васильевичым. 1957 ий 5 июньышто Киров кундем Кикнур район Цекейсола / Цекеево ялыште шочын. Скульптор. Олык Ипай лӱмеш молодежный ден Марий Эл Республикын кугыжаныш премийже-влакын лауреатышт. Марий Эл Республикын сулло сӱретчыже.

— Русинов Борис Фёдоровичым. 1957 ий 22 июньышто У Торъял район Шавыксола / Малое Танаково ялыште шочын. Бухгалтер-экономист. «Марий ушемын» чолга еҥже.

— Янышев Валентин Тойбулатовичым. 1957 ий 15 июньышто Параньга район Элпанур / Ильпанур ялыште шочын. Параньга районын онаеҥже. Ты кундемысе «Победа» озанлыкыште слесарьлан пашам ышта.

— Конаков Олег Алексеевичым. 1957 ий 21 июньышто Шернур район Купсола ялыште (Кукнур ялсовет) шочын. Калыклан паша верым ситарыме шотышто Шернур районысо рӱдерым вуйлатен.

55 ийым темыше чолга марий еҥ-влакым:

— Соловьёв Юрий Ильичым. 1962 ий 4 июньышто Шернур район Купсола ялыште (Марисола ялсовет) шочын. 2010-2016 ийлаште — «Марий журнал» кугыжаныш унитарный предприятийын директоржо. 2016 ий годсек – Марий книга савыктышын директоржо. С.Г.Чавайн лӱмеш кугыжаныш премийын лауреатше. Писатель, икмыняр книган авторжо. Псевдонимже – Юрий Косатан. Марий Эл Республикысе тӱвыран сулло пашаеҥже.

— Шибанаев Александр Александровичым. 1962 ий 18 июньышто Кужэҥер район Нурсола ялыште шочын. Труд урокым туныктышо. Мурызо семынат чапланен.

— Тоймакова Галина Александровнам. 1962 ий 30 июньышто Морко район Руш Родо ялыште шочын. Оршанке районысо туныктыш пӧлкан методистше, марий йылме объединенийым вуйлатыше. 2016 ий годсек — Мер Каҥашын еҥже, Оршанке районысо мервуй.

— Смородинов Виталий Васильевичым. 1962 ий 16 июньышто Шернур район Торешкӱвар ялыште шочын. «Стрела» ООО-м вуйлатен. Шернур район Кугэҥер ял шотан илемым вуйлатыше.

50 ийым темыше чолга марий еҥ-влакым:

— Стапеев Михаил Анатольевичым. 1967 ий 5 июньышто Курыкмарий район Марьясола / Сарамбаево ялыште шочын. Красноволжский школышто физкультурым туныктышо, директор.

— Соловьёв Анатолий Андреевичым. 1967 ий 8 июньышто Шернур район Кочанурышто шочын. МарГУ-н преподавательже, историй да филологий факультетын деканжын алмаштышыже. 2000 ий годсек — историй науко кандидат.

— Токтарова Алевтина Евгеньевнам. 1967 ий 5 июньышто Шернур район Красногорка / Красная Горка ялыште шочын. Ветеринар врач. Памашсола / Дубники ветеринар пунктым вуйлатыше.

                                           Марий Мер Каҥашын вуйверже.