Мер Каҥаш вуйверын черетан погынымашыже Советский посёлкышто пургыж / февраль тылзын 28-ше кечынже эртыш. Ты гана тыгай йодыш-влакым лончылымо:

  1. 10-шо Марий калык Погынысо Резолюцийым Совет районысо марий активын шуктымо нерген.
  2. Марий калыкын 11-ше Погынжылан ямдылалтме нерген (2020 ий).
  3. Марий Элысе районлаште самырыктукым слёт-влакым эртарыме нерген: шынык (опыт) да ончыкылык паша.
  4. Тӱрлӧ нерген.

10-шо Марий калык Погынысо Резолюцийым Совет районысо марий активын шуктымо нерген докладым Ирина Ивановна Пьянкова ыштыш.

Докладым колышт налмеке, верысе активын пашам шотанлан шотлаш пунчалым лукмо. Тыгак Мер Каҥаш Вуйверын еҥже-влак тыгай темлымаш-влакым каласеныт:

— Марий йылмым вияҥдаш манын верысе активлан марий еш-влак дене пашам вораҥдыман.

— Марий йылмым кугыжаныш йылме семын районын кажне школышто туныктыман. Тидын нерген районысо шинчымаш пӧлкан пашаеҥ-влак дене вашлийын мутланыман.

— Тиде йодыш дене вуйверын пунчалжым верысе Администрацийыш да районысо депутат-влакын Погыныш колтыман.

2020 ийысе Марий калыкын 11-ше Погынжылан ямдылалтме нерген Оньыжа Э.В. Александровын каласымыжым колыштмо.

Кокымшо йодыш дене тыгай пунчалым лукмо:

— Марий активист-влаклан шке верлаштышт погынымаш-влакым эртараш, 11-ше Погыным эртарыме нерген, тыгак содержаний могырым темлымаш-влакым ямдылаш.

         Район кӱкшытан марий самырыктукым слёт-влакым эртарымаш эркын дене йӱлаш савырна. Провой кундем, Курыкмарий да Совет районлаште слётым эртарыме нерген информацийым колыштмо. Мер Каҥаш вуйвер тиде пашам чынлан шотла. Район кӱкшытан слёт-влак ӱдыр-рвезе-влаклан мер илышыш омсам почыт, у кӱкшытыш шуаш полшат, вашкылым пеҥгыдемдат. Россий кумдыкышто тӱшкан илыме верлаштат тыгай слёт-влакым эртараш темлымаш лийын. А икымше оналмаш В.А. Мочаев «Районлаште Марий самырыктукым слётым (форумым) эртарыме нерген ой-влак» дене палдарыш. (Прим. Ой-влак дене «Марий самырыктукым слёт» рубрикыште палыме лийын кертыда).

Пытартыш йодышым лончылымеке, тыгай пунчалым лукмо: 2019 ийлан Марий Мер Каҥашын келгемдыме паша планже почеш пашам ышташ.

Анатолий Титовын фото-влак.