2015 ий  27 февральыште Мер Каҥаш вуйверын черетан погынымашыже Килемар район Арде селаште эртен.

Тӱҥалтышлан библиотекым, «Уля» ремесло пӧртым, шукерте огыл чоҥалтше йочасадым, кыдалаш школым, амбулаторийым, «Раздолье» турист комплексым, тусо этнографий тоштерым ончалын савырненыт. Йочасад ден школышто марий йылмым туныктымо йодышым рашемденыт. Палемдыман, школышто тунемше 208 икшыве гыч 80 процентше марий улыт. Тыгодым нунын кокла гыч 45 йоча гына марий йылмым шочмо йылме семын тунемеш, молыжо – кугыжаныш семын. Йочасадыш коштшо 50 икшыве гыч кокытшо — руш. Но, мо оҥайже, марий ача-ава-влакын икшывышт гыч коктын гына марла мутланен моштат. Тыге марий селаште марий икшывылан шочмо йылмым йот элласе методике почеш (языковой погружений йӧн) туныкташ тыршат.

Погынымаште Мер Каҥаш вуйверын еҥже-влак, Килемар районысо муниципальный образованийым вуйлатыше Николай Сорокин, Арда ял администрацийым, Мер Каҥашын районысо пӧлкажым  вуйлатыше Надежда Алатайкина, верысе актив (ялласе старосто, культур пашаеҥ-шамыч) лийыныт.

Вуйвер Марий форумын шошымсо сессийжым 24-25 апрельыште, пленумым 25 апрельыште эртараш пунчалын. Тушто марий йылмым, культурым да йӱлам аралымаште СМИ-влакын верышт (марий йылме дене савыкталтше икымше газетын 100 ияш лӱмгечыжлан пӧлеклалтын) нерген ойлаш тӱҥалыт. Тыгак Медведево районысо марий активын пашаж дене палыме лийыт.

Шымлызе да мер пашаеҥ, филологий науко доктор Иван Ивановын шочмыжлан 80 ий темме вашеш конференций ден семинар-влак эртаралтыт. Иван Григорьевичын ямдылыме шуэн вашлиялтше мут-влак мутержым савыктен лукташ палемдыме. Шке жапыштыже марий мер толкынын ончылеҥже семын чапланыше, шочмо йылмын яндарлыкше верч тыршыше шымлызын книгажым савыктымашке марий активат шке надыржым пыштышаш. Мер Каҥашын вуйверже мутерым савыкташ оксам погымо акцийым тарватен. Тидланже тӱрлӧ мероприятийыште, форумышто яшлыкым вераҥдаш тӱҥалыт. Оньыжа Анатолий Иванов чылаштымат поро пашаш ушнаш, тидын нерген СМИ гоч уверым шараш ӱжеш.

Погынымаште Килемар районысо марий мер паша, лекше йодыш дене Николай Сорокин ден  Надежда Алатайкина палдареныт.

Автор: Светлана Пехметова.