Параньга район Эльпанур ялыште «Унавий» ӱдырамаш клуб пашам ышта. Тудым 2015 ийыште Янышева Ольга Романовна чумырен. Кызыт тушко 16 марий ӱдырамаш коштеш. Верысе чолгаеҥ-влак Марий Эл гыч Украинысе специальный операцийыште улшо салтак-влаклан носки ден пижергым пидыт. 2022 ий октябрь гыч чылаже 387 мужырым ямдылен, кӧргешыже я шовыным, я сигаретым, я школышто тунемше-влакын возымо серышыштым пыштен колтедат. Нунылан тиде пашаште амалкалче Автономовмыт еш полшен шога. Олег Арсентьевич ден Надежда Петровна ӱдырамаш-влаклан шӱртым налын пуат. Тыге кажне изарнян, пырля погынен, ыштышаш пашам радамлат да арня жапыште мӧнгыштышт шокшо пижергым да носким пидыт.

«Унавий» ӱдырамаш клубын пашаж дене Параньга районысо депутат-влакын советшым вуйлатыше, Мер Каҥашын еҥже Михеева Любовь Леонидовна теҥгече, 27 февральыште Москошто эртыше «Сильнее стали» тематический площадкыште палдарен. Тушко СВО-што лийше Российысе регион-влакын муниципал образованийын вуйлатышышт ушненыт да шке кундемыштышт тиде виктыш дене каен шогышо пашашт нерген ойленыт. Марий Эл гычат кум еҥан делегаций лийын: тиде Марий Турек ола шотан илем вуйлатыше Суворов Алексей Николаевич, Шернур район вуйлатыше Кугергин Александр Викторович да Курыкмарий район вуйлатыше Арганякова Наталья Николаевна.

Вашлиймашыш «Унавий» ӱдырамаш клубын еҥже-влак, марий тувырым чиен, лӱмынак Йошкар-Олашке Мер полышым пуышо штабышке толыныт да тематический площадкын участникше-влак деке воткыл гоч ушненыт.

Любовь Леонидовна тыгак Усола ялыште илыше Рублёва Галина Васильевна нергенат ойлен. Тудо шке монча пулдырыштыжо маскировкылан атмам пидеш. Галина Васильевна суапле сомылыш верысе школын тунемшыже-влакым да ял калыкым ушен.

Параньга кундемыште ыштен шогымо пашам колыштат да чонлан копыж чучеш: шинчаончылно Кугу Ачаэл сарыште тыршыше, сеҥымашым лишемдаш полшышо кугезе кована-влак сӱретлалтыт. Нуно мыланнна тыныслыкым пӧртылтеныт. Тугеже кызытсе марий ӱдырамаш-влакнат чын корнышто улыт.

Тау, тыланда. Кидда лывырге, шинчада пӱсӧ, уш-акылда яндар лийышт.

Галина Ласточкина