Марий Эл Республик (Кужэҥер, Морко, Оршанке посёлкыла, Оршанке район Кугу Ӧрша ял, Звенигово район Сидельниково ял, Курыкмарий район Салымсола), Татарстан Республик (Озаҥ ден Агрыз ола-влак,  Агрыз район Пелемыш, Буймо ял-влак), Свердловск кундем Екатеринбург ола, Одо кундем Ижевск ола ден Карагöл район  Шопкер ял, Пошкырт кундем Караидель район Шопкер ял, Ленинград область Всеволожск ола. Мутат уке, Йошкар-Ола. Тиде верлаште 2016 ий 4 ноябрьыште «Айста марла кушталтена» флешмоб эртен.

Йошкар-Олаште Марий Оньыжа Эдуард Александров ешыж дене пайремыш ушнен. А пайрем Россий калык-влакын икоян улмо кечыжлан да Марий Эл Республикын кечыжлан пöлеклалтын.

Тыге калык, пырля чумырген, марий сем почеш веселан жапым эртарен. Кажныже, марий улмыж дене кугешнен, шке мастарлыкшым почын пуаш тыршен. Тыгодым моло калыкат ушнаш кумылаҥын. Марий куштымашым мондаш лиеш мо!? Тудым ончычсо семынак тукым гыч тукымыш шарен толман.

Куштымашлан тÿҥ шотышто Марий самырык тукымын Россий кÿкшытан VIII слётшын еҥже-влак вуйын шогеныт. Вет «Айста марла кушталтена» регион-влак кокласе флешмоб» проект лач тиде слёт годым шочын. «Ӱжара» икымше лужан пашаже!

Проектым «Марий мер толкын» регион-влак кокласе мер толкын да «ИНТЕЛЛЕКТУАЛ» тӱвыра-увер рӱдер илышыш шыҥдараш полшеныт. Кугу тау Йошкар-Оласе администрацийлан да тÿрлö верысе вуйлатыше-влаклан!

Тиде акций денак Марий Эл Республикысе калык-влак тÿвыра дене кылдалтше самырыктукым фестивальышке ушнымо.
«Айста, марла кушталтена» флешмоб икымше гана эртаралтын. Куштымаш пайрем шкенжым сай могырым ончыктен, регионлаштат ятыр калыкым поген. Шуко кундемыште калык марий вургемым чиен але марий шовычым пидын лектыныт. Тидыже чоным моткоч куандара.

Акцийым кажне ийын але идалыкеш икмыняр гана эртараш шонымаш уло.

 

Автор-влак: Эльвира Куклина ден Вероника Мустаева.