Моткоч сылне пагыт, кеҥеж эртен кайыш. Весела кумыл, куан, каныш – чылажат ситышын лийын. Тыгодымак мемнан пашана вораҥын.

2016 ий сорла тылзе тӱҥалтыште чолга ӱдыр-рвезе-влак Россий кӱкшытан VIII марий самырыктукым слётыш ушнышт. Нуно тӱрлӧ кундем гыч лийыч, но пырля, келшен, пашам ыштышт. Чынак, Марий кундемнам, марий калыкнам, марий йылмынам тӱзатыме верч кажне кечын тыршыман. Тыге ме, ты шотышто пашам ворандарен колташ манын, проект-влакым возышна.

Ик тыгай проект дене палдараш ямде улына. Тудым VIII Марий самырыктукым слётын икымше «Ӱжара» лужаже шонен луктын. Ты проект «Айста, марла кушталтена!» регион-влак кокласе флешмоб» маналтеш.

Проектын тӱҥ цельже: марий калыкын тӱвыражым моло калык коклаш куштымаш гоч шараш. Сандене тиде флешмобыш тӱрлӧ регионым ушнаш ӱжына.

Рӱж марла куштымаш 4 ноябрьыште эрта. Чыланат ойырен налме верышке ик жапыште кушташ лектына.

Мемнан деке ушныза! Ача-авадам, родо-тукымдам, йолташ ден палымыда-влакым пырля ӱжса! Увер-влакым «ВКонтакте» соцсетьын посна группыштыжо да «Арслан» этнокультур интернет-журналыште эскерен шогыза. Проектым «Марий мер толкын» регион-влак кокласе мер толкын да «ИНТЕЛЛЕКТУАЛ» тӱвыра-увер рӱдер илышыш шыҥдараш полшат.

ВКонтактыште группо – https://vk.com/marlakyshtena. Сайт – http://mari-arslan.ru.

Координатор-влак: Васильева Анна Васильевна (8-987-729-47-84, anuta1994-1994@mail.ru) и Александрова Эльза Эдуардовна (8-907-139-44-64,aleksandrova99elza@yandex.ru).

Флешмобышто вашлиймеш!!!

Пагален, Анна Васильева, «Ӱжара» лужам вуйлатыше (лужавуй).