2023 ий 28 ӱярнян, Пошкырт кундемын чолга мер еҥже, Калтаса районысо калыкле-тӱвыра автономийын вуйлатышыже, Инна Ивановна Тимиряеван шӱмжӧ кырымым чарнен.

Инна Ивановна Калтаса районысо Кӧкыш ялыште шочын кушкын, Ӱлыл Качмаш кыдалаш школым тунем пытарымек, Марий кугыжаныш университетын историй да филологий факультетыштыже шинчымашым поген. 1997 ийыште Эстонийысе Тарту университетын магистратуржым, варажым докторантуржым пытарен, диссертацийым арален, философий доктор шанче степеньым налын. 2005 ийыште Башкортостан Президент пеленсе кугыжаныш службо да управлений академийым тунем лектын.

Инна Ивановна ятыр ий Калтаса районысо администрацийыште тыршен, пытартыш ийлаште районысо историй да краеведений тоштерын вуйлатышыже лийын.

Мер пашаште чолгалыкым ончыктымыжлан ятыр гана Марий калык Погынын делегатшылан, 2016-2020 ийлаште Мер Каҥашын еҥжылан сайлалтын, Калтаса районысо калыкле-тӱвыра автономийым вуйлаташ ӱшаненыт.

Пошкырт республикысе тӱвыран сулло пашаеҥже И.Тимиряева 2022 ийыште «Женщина — мать нации» российысе конкурсын «Женщина — ученый» номинацийыште сеҥышыш лектын.

Марий Мер Каҥаш Инна Ивановнан ӱмыржӧ лугыч лиймыжлан лишыл еҥжылан, родо-тукымжылан кугу чаманымашым каласа.

Кайыме корныда волгыдо лийже, узьмакыште коштса, пагалыме Инна Ивановна.