14 шыжан марий калыкын ик эн тале, лӱмлӧ айдемыже, Ксенофонт Никанорович Сануковын, шӱмжӧ кырымым чарнен. Марий мер илышлан да финн-угор шанче тӱнялан нимучашдыме ойго да кугу йомдарымаш.

Тудын лӱмжӧ дене марий историй, 90 ийласе мер илышын вияҥмашыже чак кылдалтыныт. Шочмо кундемжым йӧратыше, тудын нерген кугу трибуна гыч ойлышо, марий эртыкым шымлыше Ксенофонт Никанорович, шочмо калыкнан чын патриотшо лийын. Лӱмлӧ шанчызе шке шанче школжым чоҥен, тудо Марий Элын да финн-угроведений калыкын историйжым шымлыше негызыш савырнен.

Илышым йӧратыше, тудлан куанен моштышо Ксенофонт Никаноровичын марий калык ончылно суапше нимучашдыме. Марий калыкын эртыкшым 16 гыч тӱҥалын 20 курым марте шымлен, 30 ийлаште репрессийыш титак деч посна логалше-влаклан чын лӱмыштым пӧртылташ полшен,  шочмо калыкна дене йот эллаште савыкталтше шанче паша гоч палдарен.

Ксенофонт Никаноровичын илыш пӱрымашыжат шке шотан. Тыглай кресаньык еш гыч лекше, марий ялыште шочшо еҥ историйыште  шке лӱмжым шӧртньӧ буква дене возен коден,  студент-влак дене пагалыме да йӧратыме профессор, академик, историй наука доктор, Йошкар-Олан почётан гражданинже…

Марий Мер Каҥаш Ксенофонт Никаноровичын лишыл родо-тукымжылан чаманымашым каласа.

Кийыме мландыда пушкыдо лийже, Ксенофонт Никанорович.