2017 ий пеледыш / июнь тыллзын икымше кечынже Йошкар-Олаште республикысе йоча-влаклан «Изи мӧр пеледыш» пайрем эртен. Тудо нылымше гана эртаралтын.

Каласыман: икымше гана тиде пайрем 2013 ий 7 июньышто Совет район Ӱшнур школ пелен лийын. Тудым Йоча Пеледыш пайрем Регион-влак кокласе «Изи мӧр пеледыш» фестиваль манын увертареныт ыле. Пайрем тунам шуко икшывым ик верыш чумырен: республикын 16 школжо гыч 300 наре йоча погынен улмаш. Чыланат сылне марий тувыр дене лийыныт.

Йоча-влаклан Пеледыш пайрем сынан «Изи мӧр пеледыш» фестивальым эртарыме нерген шонымаш чолга марий пӧръеҥ Советский район Ӱшнур школын директоржо Галкин Валерий Фёдоровичлан толын. Тудо тыгай темлымаш дене Мер Каҥашыш миен. Организатор-влаклан Марий Эл Республикысе образований да науко, тӱвыра, печать да калык-влак кокласе министерстве-влак полшеныт.

Пайремын ик тӱҥ шонымашыже: марий йӱлам тукым гыч тукымыш шарен толаш, йоча-влак изинекак шочмо йылмыштым пален, калыкыштым аклен, тӱвырашт дене кугешнен кушташ.

Тений «Изи мӧр пеледышым» Марий тӱвыра рӱдер Курчак театр дене пырля чумыреныт. Пайремым эртарымаште финанс дене Йошкар-Ола администрацийын тӱвыра управленийже, Кугыжаныш Думын Марий Эл Республик деч депутатше Солнцева Светлана Юрьевна да Марий кундемысе «Саскавий» марий ӱдырамаш ушем полшеныт.

Тенийысе пайремышке организатор-влак интернат-пӧртлаште илыше да начар тазалыкан икшыве-влакым ӱжыныт. Курчак театрышке ты кечын Йошкар-Оласе, Медведево да Совет районласе школлаште тунемше-влак толыныт. Погынышо-влакым эн ончыч кеҥеж да куан пагыт тӱҥалме дене Кеҥеж вургеман артистке саламлен. Ты сомылым Марий Элын калык артисткыже Лисицына Эльвира Семёновна шуктен.

Варажым фойеште шке мастарлыкышт дене «Изи памаш», «Кубеляк» да «Юкече» ансамбль-влак куандареныт. Курчак театрын артистше-влак сценыште «Золотой цыплёнок» музыкальный спектакльым модын ончыктеныт. Тылеч вара шовын гыч шӱвыроҥым ыштылме шоу лийын. Тидыже тӱрлӧ ийготан йоча, влаклан путырак келшен. Пайремыште чыла икшывылан шере пӧлекым кучыктымо. Кажне йоча тышеч кумыл нӧлтшӧ да весела каен.