9 ӱярнян марий калыкын ик эн йӧратыме, палыме да пагалыме эргыже, кумдан чапланыше театр актёр, поэт да драматург, кусарыше, публицист Василий Михайлович Регеж-Гороховын шӱмжӧ кырымым чарнен.

Василий Михайлович – СССР Писатель ушемын еҥже, 300 утла мурын да 20 утла книган авторжо. М.Шкетан театрын сценыштыже тӱрлӧ планан рольым чоҥен, кажне образше шӱмеш логалше, шарнымашеш кодшо.

Икымше марий почеламут сборникше 1963 ийыште ош тӱням ужын.

1978 ийыште Василий Регеж-Горохов Марий АССР-н кугыжаныш премийын лауреатше лийын. Тудо РСФСР-н сулло артистше (1988), Марий АССР-н сулло артистше(1977), Марий АССР-н калык артистше (1980), Марий Элын калык писательже (2007).

Марий Мер Каҥаш Василий Михайловичын ӱмыр лугыч лиймыжлан ойгана да родо-тукымжылан чаманымашым каласа.