Пагалыме марий-влак!

Марий Мер Каҥаш лÿм дене алал кумылын кугу марий пайрем – Марий талешке кече – дене саламлем!

Тений ме Марий талешке кечым кумло кокымшо гана палемдаш тӱҥалына. Тудым Марий Элыште веле огыл, пÿтынь марий тÿняште кумдан аклат. Кызытсе неле саманыште кажне марий еҥын чонжым кугезе сугынь вӱчкен, эртыме корнынам пален,  ончыко наҥгайышаш.

Шкенан кугезе патырна-влакым, шке йырышт тале сарзе-шамычым чумырышо он-влакым поснак чот жаплышаш улына. Нуно тӱрлӧ тушман деч калыкнан илышыжым да эрыкшым, шочмо мландын моторлыкшым, курымла дене вияҥ толшо йӱлам, шочмо йылмынам да сӧрал тӱвыранам арален шогеныт.

Шарныза, калыкнан илыме курымыштыжо тӱрлӧ чер, тӱрлӧ туткар лийын. Мемнан кугезе талешкына-влак ик йол ошкылланат шеҥгек чакнен огытыл, саманын тӱрлӧ ийыштыже нуно калыкым азап, осал пӱрымаш деч кораҥден да арален моштеныт.  Кызытсе илыш мемнан дечат тидымак йодеш. 

Ӱшанем, мемнан вий-куатна, элнан чын корно дене кайымыже тиде неле жапым писын кораҥда, калыкнан ончыкылык илышыже волгыдо корно дене эрташ тӱҥалеш. Лач калыклан ыштыме поро паша да лӱддымылык келге кышам кода. 

Талешке кече дене, марий калык! 

Марий Оньыжа

Эдуард Васильевич Александров