5 июльышто Марий Оньыжа Анатолий Иванов Марий юнкор слётын участникше-влак дене вашлийын. А тыгай слёт 1-7 июльышто Шернур район Марисолаште (Марий Эл) ынде кандашымше гана эртен. Тушто Марий Элын икмыняр верже, Пошкырт кундемын Калтаса ден Мишкан районлаж, Татарстан Буймо вел гыч толшо 27 ӱдыр-рвезе «мут пашалан» тунемыныт.

Ты гана слёт С.Г.Чавайнын шочмыжлан 125 ий теммылан пӧлеклалтын.

Слёт кышкарыште ятыр оҥай еҥ дене вашлиймаш-влак эртеныт. Теве радиожурналист Вячеслав Кольцов шке йӧратыме пашаж нерген каласкален. Марий писатель ушемым вуйлатыше, «Кече-Солнышко» журналын тӱҥ редакторже Светлана Архипова денат мутланымаш оҥайын эртен.

Поэтесса, журналист Зоя Дудина Сергей Чавайн нерген презентацийым ончыктен, йоча-влак дене пырля «Ото» почеламутын могай йӧн дене возалтмым лончыленыт, тиде сылнымутым тӱрлӧ йылме дене лудын онченыт.

Игорь Садовин деловой модыш дене куандарен.

Тыгак вашлиймашке толыныт республикысе тӱвыра, печать да калык-влк паша шотышто министерствын печать да тӱшка коммуникаций управленийжым вуйлатыше Владимир Маркин, «Край Сернурский» ден «Шернур вел» газет-влакын тӱҥ редакторже Елена Лебедева да молат.

Ӱдыр-рвезе-влак кажнышт деч автографым налаш да пырля войзалташ тыршеныт. Уна-влаклан «Эр вий» йоча организацийын галстукшымат пижыктеныт. Теве ик кечын Анатолий Ивановынат шӱйыштыжӧ тыгай галстук лойгыктен.

Слётын участникше-шамыч Желонко ялысе вӱдвакшыште, Шабдар Осыпын шочмо Изи Лужалу ялыштыже, Шернурысо тоштерыште лийыныт.

А тыгай слётым «Ямде лий» газет редакций Марий Элысе тӱвыра министерстве да Финляндийысе М.А.Кастрен Общество полшымо дене эртара.

Автор: Эльвира Куклина.