17 мартыште Мер Каҥаш вуйвер исполкомын еҥже-влак Виктор Иванов, Александр Петров да Марий Эл Республикысе туныктымаш да шанче министерствын пашаеҥже Галина Малинина Параньга район Матародо кыдалаш школыш миен коштыныт.
Уна-влак марий литератур дене кок урокышто лийыныт. 9 классыште урокым Нина Алексеевна Семёнова мастарын вӱден, а 4 классыште Светлана Михайловна Максимова шке моштымашыжым ончыктен.
Тиддеч вара «Пагален ӱжына Марий Элыш» патриот шӱлышан мероприятий эртен. Тыште калык-влак коласе, тӱрлӧ йӱлам кучышо-влак коласе кыл шижалтын, шочмо ялым йӧратымаш кумыл озаланен.
Тыгак Йошкар-Ола гыч мийыше-влак 9-11 класслаште тунемше ӱдыр-рвезе-влак дене вашлийыныт. Виктор Иванов Мер Каҥашын пашаж, марий пайрем-влак нерген каласкален. Александр Петров усталык пашаж дене палдарен, почеламутшым лудын.
Матародо школышто марий шÿлыш озалана, марий йылмым, тÿвырам арален шогат.
Автор: Эльвира Куклина.
Обсуждение закрыто.