2015 ий 18 февральыште Мер Каҥаш вуйвер исполкомын еҥже-влак Виктор Иванов, Александр Петров, Марий Эл Республикысе туныктымаш да шанче министерствын пашаеҥже Галина Малинина Кужэҥер район Коҥганур кыдалаш школыш миен коштыныт.  Нуно ты тӧнежыште марий йылмым кузерак тунемме дене палыме лийыныт.

Уна-влак 6-шо классын марий йылме урокыштыжо лийыныт. Урокым кӱшыл квалификациян туныктышо Галина Степановна Тобекова вӱден.

Галина Степановнан виктарымыж почешак, 10-11 классыште тунемше-влак Ӱярня пайрем гыч ужашым модын ончыктеныт.

Тыгак уна-влак школ тоштерым ончал савырненыт. Вара туныктышо, кугурак классысе ӱдыр-рвезе-влак дене ик верыш чумырген мутланеныт.

Палемдыман, Коҥганур школышто марий йылмым 1-11 класслаште шочмо йылме семын тунемыт, кеч икмыняр йоча руш уло. Тыште марий шӱлыш озалана, марла ойлат, стенд-влакым марла возымо.