5 декабрьыште «Саскавий» марий ӱдырамаш ушем «Мый улам марий ӱдырамаш» ныжыл касым эртарен. Вашлиймаш Марий телевидийын историешыже мондалдыме кышам кодышо диктор Роза Рябцева дене лийын. Чолга марий ӱдырамашым Марий Оньыжа Анатолий Иванов саламлен да Марий Эл Кугыжаныш Погынын Тауштымашыжым кучыктен. Тудо Роза Викторовналан чон ласкалыкым да порын йӱлымашым тыланен, вет тунам илет, илышлан куанет да тазалыкат лиеш.

Республикысе тӱвыра, печать да калык-влак кокласе паша шотышто министрын алмаштышыже, «Саскавий» ушемым вуйлатыше Галина Ширяева Роза Рябцевам С.Г.Чавайн лӱмеш «Калык верч тыршымаш» медаль дене суапландарен.

Кумдан палыме марий диктор деке унала ятыр йолташыже, коллегыже погынен. Тудым телевидений гыч Аркадий Сергеев, Нина Бельская, Алёна Иванова саламленыт. Пайремыш Оршанке районысо «Ошлавий» марий ӱдырамаш ушем ден «Ошла сем» ансамблят ушненыт. Тиде ансамбльын участницыже Валентина Добрынина дене пырля Розя Рябцева, самырык пагытыштым шарналтен, мурымат йоҥгалтареныт.

Кас мучко Рябцеван илыш корныж нерген ойленыт, «Марий Эл» ГТРК-н фондшо гыч дикторын вӱдымӧ передачыже-влак ончыкталтыныт, тыгак муро ден почеламут-влак йоҥгеныт. Теве Татьяна Степанова ден самырык мурызо Виктор Апталиков муреныт.

Каслан посна тамым марий вургем дефиле пуртен. Тудо тӱҥалтыштак лийын да кас кузе эртыме нерген шижтарен: сценыште, йоча гыч тӱҥалын, ӱдыр, самырык, кокла ийготан да кугурак ӱдырамаш-влак марий вургемым чиен эртеныт. Чынак, кеч-могай айдеме посна илыш корным эрта, шуаралтеш да могай-гынат кӱкшытыш шуэш. А теве Марий кугыжаныш университетын «Ший Пампалче» композицийым модын ончыктымышт Вуешшушо марий ӱдырын кечыжым илышыш шыҥдараш тӱҥалме нерген ойлен.

А у проектын авторже – тыгаяк чолга ӱдырамаш, «Саскавий» ушем вуйлатышын алмаштышыже Ираида Степанова. Мутат уке, «Саскавий» ушем сай пашалан пижын. «Мый улам марий ӱдырамаш» у проект кумдан палыме, марий тӱняште йоҥгалтше ӱдырамаш-влак нерген – вашлиймаш кас гоч тыгай еҥ-влакым чапландарат.

Автор: Эльвира Куклина.