26 мартыште Мер Каҥаш вуйвер погынымаш эртен. Тӱҥ шотышто шушаш Марий форум: шошо сессийлан ямдылалтме нерген мутланеныт.

Погынымашым Марий Оньыжа Анатолий Иванов вӱден. «Марий форум: шошо сессий» конференцийын да Пленум погынымашын паша радамже нерген Мер Каҥаш вуйвер исполкомым вуйлатыше Виктор Иванов каласкален. Тыгак тудо темлымаш да пунчал проект нерген ойлен коден.

Тиде кечын вуйверын еҥже-влак кокымшо кварталлан паша кышкарым ончен лектыныт.

Погынымашке Мер Каҥаш вуйверын тораштырак илыше еҥже-влак — Одо кундем гыч Анатолий Радыгин, Татарстан Республик гыч Олег Третьяков — ушненыт.

Мучаште Марий Оньыжа, эрласе Марий форумлан лектышым тыланен, ты погынымашын пашажым иктешлен.