6 октябрьыште Мер Каҥашын чолга еҥже-влак, Марий Оньыжа Анатолий Иванов Чавайн лӱмеш эртыше пайремыште участвоватленыт.

2013 ий Марий Элыште Чавайн идалык семын палемдалтын. Вет 6 октябрьыште Марий сылнымутлан тӱҥалтышым пыштыше Сергей Чавайнын шочмыжлан 125 ий темын. Тиде кечын шым шагат эрдене Йошкар-Оласе С.Г.Чавайнын памятникше воктеч кушталаш йӧратыше-влакын «Айвика» клубышт гыч 25 еҥ кужу корныш лектын. Нуно 125 меҥгым Чавайнур марте куржыныт.

Ты памятник воктекак 9 шагатлан писатель, мер пашаеҥ да моло аланыште тыршыше чолга еҥ-влак, тыгак Чавайнын тукымжо чумыргеныт да пеледышым пыштеныт. Тушко чыла кумылан ушнен кертыныт.

Вара калык, погынен, Морко велыш кудалын. Тушто 12 шагатлан Чавайнур тураштырак, Чавайн отышто 30 наре тумо ден пистым шынденыт. Илен-толын, тудо гӱжлышӧ отышко савырнышаш.

Кас велеш Чавайнурышто Сергей Чавайным шарныме пайрем эртен.

А 3 октябрьыште Т.Евсеев лӱмеш национальный тоштерыште «Взгляд сквозь призму столетий» выставке почылтын. Тоштерыште Сергей Чавайн дене кылдалтше 167 экспонат аралалтеш. А выставкышке 34-м луктыныт. Ятырым журналист Анатолий Титов погаш полшен, тышке тудын фотографийже-влак пуреныт. Выставке Морко да моло районысо школлашке лек тын коштшаш.

А выставкым почмо дене Анатолий Титовым, тоштерым Марий Оньыжа саламлен.