Актуганов В.М., Кужэҥер районысо Токтайбеляк кундемын онаеҥже

Мер Каҥаш марий калыкын чолга да пеҥгыде вий-куатан эргыже, Кужэҥер районысо Токтайбеляк кундемын тале онаеҥже Вячеслав Михайловичын Актугановын ош тӱня дене чеверласымыжлан ойгана да пелашыже Агния Ильиничналан чаманымашым каласа. Кугешнена тыгай Айдеме лийме дене, тек ыштыме пашаже умбакыжат вияҥеш да тӱзлана. Узьмакыште коштса, пагалыме Вячеслав Михайлович.

Вячеслав Михайлович Актуганов 1955 ий 15-ше пургыжын Кужэҥер районысо Шинур ялеш шочын-кушкын. Пӱтынь паша корныжо ялозанлык дене кылдалтын.
Онаеҥ марий кумалтыш радамым сайын пален да пеҥгыдын кучен. Марий Элысе тӱрлӧ районысо кумалтышлаште, Виче кундемысе Чумбылат курыкышто вуйым савен шоген. Ял, еш, мер, тӱня кумалтышым ятыр эртарен. Неле пагытыште тудын деке шукын полышым йодын толыныт. Вячеслав Михайлович полыш кидым шуялташ эре ямде лийын.
Марий чонжым куандараш ялыштыже «Ший аршаш» фольклор ансамбльым чумырен, кудыжо тӱрлӧ пайремлаште ӱжмӧ да вучымо уна лийын кодеш.
Вячеслав Михайлович ятыр ий Йошкар-Олаште эртарыме марий пайремлаште, кеч ола, кеч регион кӱкшытан вашлиймашлаште юмылан пелештен.
Марий йӱлам туныкташ кӱлмым эн тӱҥ пашалан шотлен, садлан радио, телевидений, марий газетла гоч тиде пашам виктарен.
Пытартыш жапыште Вячеслав Михайлович марий калыкын ойыртемалтше йӱлаж нерген интернет гочат палдарен шоген. Рвезе еҥ-влакым кумалтыш радамым эртараш туныктен, поро каҥашым пуэн.
Калыкнам шот радам дене илаш туныктышо, марий йӱлам пеҥгыдын кучышо Вячеслав Михайлович мемнан чоныштына поро шарнымашеш кодеш.