Теҥгече, 2 октябрьыште, Российысе сымыктыш искусствын пашаеҥже, Марий Эл Композитор ушемын вуйлатышыже Валерий Дмитриевич Кульшетовын шӱмжӧ кырымым чарнен.

Валерий Дмитриевич 1952 ий 17 октябрьыште Марий Турек селаште шочын.

Ачажат Дмитрий Михайлович кундемыштына палыме композитор лийын, 20 тӱжем утла марий калык мурым поген.

Валерий Дмитриевич Йошкар-Оласе 14-ше №-ан гимназийым, Йошкар-Оласе музыкальный училищым, Москосо Чайковский лӱмеш консерваторийым тунем пытарен.

Палантай лӱмеш Тӱвыра да сымыктыш колледжыште туныктен, 1997 ийыште «Музыкальное искусство эстрады» пӧлкам почмаште тудын надырже пеш кугу. Ятыр лӱмлӧ марий, руш, татар артист-влак тиде пӧлкам тунем пытареныт.

2006 ий гыч Российысе Композитор ушемын Марий Элысе пӧлкажым вуйлатен.

Олык Ипай лӱмеш кугыжаныш премийын лауреатше, Марий Эл искусствын сулло пашаеҥже (1995), Россий искусствын сулло пашаеҥже (2004) лӱм-влакым сулен, 2017 ийыште «За заслуги перед Марий Эл» орденын медальже дене суапландаралтын.

Лӱмлӧ композитор, марий Талешкына дене чеверласымаш эрла, 4 октябрьыште, 9 шагатат 30 минутлан Палантай лӱмеш музыкальный училище воктене лиеш.

Кайыме корныда волгыдо лийже, суапыште коштса, пагалыме Валерий Дмитриевич.