Анатолий Николаевич Иванов 1947 ий 4 идымын Морко район Изи Корамас ялыште шочын кушкын.

18 ий гыч Марий машиностроительный заводышто практикант-регулировщик, варажым техник-конструкторлан тыршен. Совет Армий деч вара кӱшыл шинчымашым Горький лӱмеш Марий политех институтышто налын. Варажым Марий машиностроительный заводышто ондак регулировщиклан, «Марий машиностроитель» объединенийысе партий комитетын секретарьжылан тыршен.

1983-1988 ийыште КПСС-н Йошкар-Оласе горкомын агитаций да пропаганде отделын вуйлатышыже лийын. Тиде жапыштак Горький кӱшыл партийный школым тунем лектын.

1988 ий гыч 1992 марте Анатолий Николаевич Йошкар-Оласе калык депутат Совет вуйлатышын алмаштышыже, 1998 ий гыч Сбербанкын «Марий Эл» отдел начальник, Келшымаш пӧртын консультатшылан тыршен.

1998 ий гыч 2009 ий марте Анатолий Николаевич Марий Эл Президент администраций верысе самоуправленийын пашажым виктарыше пӧлка вуйлатыше, Марий Эл Правительстве вуйлатыше алмаштышын секретариатшым вуйлатыше лийын.

Анатолий Николаевич тыгак Йошкар-Оласе калык депутат Советын депутатше, варажым Марий Эл Кугыжаныш Погын вуйлатышын алмаштышыже (V, VI созыв) лийын.

2012 ийыште эртаралтше Марий калык Погын Анатолий Николаевич Ивановым Оньыжалан сайлен.

Пагалыме Анатолий Николавич, Марий Мер Каҥаш тендам 75 ияш лӱмгече пайрем дене алал кумылын саламла. Пеҥгыде тазалыкым, ласка илышым, вий-куатым тылана. Тек тендан ешда тичмаш, родо-тукымда пиалан да таза лийыт. Ваш-ваш эҥертен, полшен илыза.