2014 ий 24 июньышто Марий Эл Республикыш РФ правительствын председательже Дмитрий Медведев толын коштын. «Единая Россия» партийын верысе пöлкаж дене вашлиймаш годым Марий Эл Кугыжаныш Погын вуйлатышын алмаштышыже, Мер Каҥашым вуйлатыше Анатолий Иванов Медведевлан марий тÿран тувырым пöлеклен.

Партийын чолга еҥже-влак дене вашлиймаш годым РФ правительствын председательжылан моткоч шуко йодышым пуэныт. Тыге Дмитрий Медведев самырык ешлан илыме верым налаш полшымо шотышто федерал программым 2020 ий марте шуйымо нерген ÿшандарен.

Тиде кечын Медведев Патриаршей площадьым, Республикысе курчак театрын у зданийжым ончал савырнен, Национальный художественный галерейыште лийын. Тушто Российысе вÿдышö театр-влакым вуйлатыше-шамыч дене вашлиймаш эртен. А мучашлан премьер-министр Э.Сапаев лÿмеш опер да балет театрын у зданийыштыже чумыргышо калыкым у театр дене саламлен.

Палемдыман, Дмитрий Медведев Марий Элыште икымше гана 2010 ийыште лийын да ты гана кундемнан сай могырыш вашталтмыж нерген вигак каласыде чытен огыл.