21 июньышто Йошкар-Олаште марий тӱвыран регион-влак кокласе «Пеледыш пайремже» эртыш. Пайремым торжественно почмаште Марий Элым вуйлатыше Леонид Маркелов лийын. Тудо погынышо калыклан улан да тӱзланен илаш, пайремым чаплын эртарен колташ тыланен.

«Пеледыш пайремым» почмаште тыгак РФ Кугыжаныш Думын депутатше Лариса Яковлева, РМЭ-ште тӱҥ федерал инспектор Роман Береснев, тӱвыра, печать да калык-влакын пашашт шотышто министрын алмаштышыже Галина Ширяева саламлыме мутым ойленыт.

Пайрем кумылан калыкым Марий Оньыжа – Мер Каҥашым вуйлатыше, Марий Эл Кугыжаныш Погын Председательын алмаштышыже Анатолий Иванов саламлен. Тудо Кугыжаныш Погынын Чап кагазшым шуко шочшан Александровмыт ешлан кучыктен. Тиде еш шукерте огыл «Юлкундемысе ончыл еш» округ кумдыкан таҥӱчаш-фестивальыште лийын.

Йошкар-Олаште илыше да тудын унаже-влакым марий калыкын тӱҥ онаеҥже, Мер Каҥашын еҥже Таныгин саламлен да сугыньмутым каласен.

«Пеледыш пайрем» Марий Элын рӱдолашкыже ик кугу мотор пеледыш аршаш семын республикысе тӱрлӧ районла гыч, тыгак Башкортостан, Татарстан, Удмуртий, Киров, Угарман, Свердловск, Пермь кундемла гыч родо-тукымна-влак погыненыт ыле. Ты гана марийын илыш-йӱлаже да тӱвыраже дене РФ-се Финн-угор СМИ-н VI форумышкыжо толшо журналист-влакат палыме лийын кертыныт.

Ты кечын йӱлаш пурышо Агавайрем эртаралтын, делегаций-влак землячествышт дене вашлийыныт, ола уремла дене рўж погынен каеныт. Кажне мероприятият пеш оҥай лийын, вет тушто муро йоҥген, чон каналтен кушталташ лийын, тамле пура да вужга мелна дене сийленыт. А кажне делегацийын чиемже могай сылне ыле – чылт шонанпылла але олыкысо тӱрлӧ-тӱрлӧ пеледышла шыри-вури волгалтын!

«Пеледыш пайрем» шошо агам мучашлыме дене кылдалтын, сандене ты пайрем годым эртак ялозанлык пашаеҥ-влакым саламлат. Республикысе ялозанлык да кочкыш министрын алмаштышыже Антон Хлопов ойыртемалтше район-влакым, озанлык да механизатор-влакым саламлен. Эн сай муниципал район семын Советский районым палемдыме (вуйлатышыже Валентин Епифанов).

«Кудо» конкурсышто шке мастарлыкшым 14 участник ончыктен: тышке республикысе 12 муниципал район, Башкортостан да «Марий Эл» газет ушнен. Икымше верым Кужэҥер кундемын «Кудыжо» сеҥен налын.

Моткоч сайын, кумылым нӧлтышын эртыш «Мелна пайрем». Тудым марий ӱдырамаш-влакын «Саскавий» ушемышт чумырен. Тышке 17 участник ушнен, нуно калыклан ончалаш да тамлаш 30 утла тӱрлӧ мелнам темленыт. Мелна оза-влакым чылаштымат шарнымашан пӧлек дене палемдыме.

Спорт таҥасымаште сеҥышыш лектыныт: Денис Хайруллин (чимарий кучедалмаш), Владимир Веденеев (кидвийым тергымаш, кирам нӧлтымаш).

«Шокто, гармонь!» таҥӱчашыште республика гыч да туддеч ӧрдыж гыч толшо 10 еҥ усталыкшым ончыктен.

«Йыр куштымаш» республик кӱкшытан фестивальыш 500 утла еҥ ушнен. Куштымаш варажым икшырымын гына этнодискотекыш куснен. Тыште марий эстрадын шӱдыржӧ-влак калыклан сай деч сай кумылым пӧлекленыт.

«Пеледыш пайремым» ямдылаш да эртарен колташ кугу вийым пыштеныт: Республикысе марий тӱвыра рӱдер, Мер Каҥаш, Я.Эшпай лӱмеш Марий кугыжаныш филармоний, М.Шкетан лӱмеш Марий кугыжаныш драме театр, И.С.Палантай лӱмеш республикысе тӱвыра да сымыктыш колледж, Йошкар-Оласе тӱвыра управлений, «Саскавий» марий ӱдырамаш ушем, Самырык-влакын «Рвезылык» усталык ушемышт. Пайремын учредительже: Марий Элысе Тӱвыра, печать да калык-влакын пашашт шотышто министерстве, Ялозанлык да кочкыш министерстве, Мер Каҥаш. Проектым «2013-2020 ийлан Марий Эл Республикын кугыжаныш национальный политикыже» республикысе целевой программе кышкареш илышыш шыҥдарыме.

Автор: Эльвира Куклина.