Сорла (август) тылзын 24-ше кечынже Йошкар-Оласе Мер-политик рӱдерыште Мер Каҥашын вуйверже погынымашым эртарен.

Тушто икмыняр йодышым ончен лекме. Эн ончычак погынышо-влак Икымше оналмаш Мочаев Валерий Александровичын марий мер толкын-влак дене вашкылым кучымо да тудым пеҥгыдемдыме паша шотышто каласкалымыжым колыштыныт. Тудо палемден: «Мемнан кундемыште куд мер толкын пашам ышта: Марий Мер Каҥаш, «Марий ушем», «Марий калык конгресс», «Саскавий», «ВийАр» да «У вий». Чыла нине организаций-влак пашам шке уставышт почеш ыштат, сомылыштым шкевуя организоватлат. Координатор пашам Марий Мер Каҥаш шукта. Ме вӱден наҥгаен огына керт, нунылан каҥашым гына пуэн кертына. Чыла нине организаций-шамыч гыч еҥ-влакым Марий форум-влакын пашашкышт ӱжына. Пытартыш жап марте «Марий калык конгресс» дене пеш чак пашам ыштыме. Конгрессын районлаште шке пӧлкаже-влак улыт. Тиде пеш яжо». Тыгак кажне мер ушемын шуктен шогымыж нерген шке шонымашыжым ойлен.

Кокымшо йодыш эртаралтше Пеледыш пайрем шотышто лийын. Тудлан акым Икымше оналмаш Мочаев Валерий Александрович ден Мер Каҥашын еҥже Кошкина Людмила Ивановна пуэныт. Каҥашымашке Оньыжа Александров Эдуард Васильевич ушнен. Тудо вес гана Пеледыш пайремысе мероприятий-влакым йыгырерак эртараш темлен да театрысе артист-влакын ситыдымышт шижалтын манын.

Россий кӱкшытан IX Марий самырыктукым слётын лектышыж нерген Икымше оналмаш Мочаев Валерий Александрович ден оналмаш Эштуков Игорь Викторович ойленыт. Иктыже вес гана слёт спорт да идеологий шӱлышан лийшаш манын, весыже слётын пашаж нерген фотороликым ончыктен. Вуйверын еҥже-влакат шке темлымашыштым луктын каласеныт. Теве Титов Анатолий Анатольевич слётын программышкыже марий йылмым вияҥдыме да вуйлатыше-влакым ямдылыме йодыш-влакым пурташ темлен. Матвеев Михаил Иванович слётын учредительжылан «Кугарня» газетым ышташ лиеш манын. А Гурьянов Александр Владимирович тыгай слёт-влакым районлаште эртараш тӱҥалмым мокталтен да кажне районлан темлаш шонымашыжым ойлен.

Вес йодыш Башкортостан Республикыште Мишкан районысо Марий Мер Каҥаш активын паша шыныкше (опытшо) нерген лийын. Тушто шукталтше пашам Мер Каҥашын еҥже Ибулаев Алексей Васильевичын колтымо серышыж гыч пален налаш йӧн лийын. Тушто возымо почеш, Пошкырт кундемыште марий йӱлан утыр шарлымыже коеш. Сандене серышын авторжо ты йодышым Марий самырыктукымын слётыштыжо кумданрак ончаш темлен серен.

Погынымаш мучаште Мочаев Валерий Александрович АФУН-ын сентябрьыште эртышаш погынжо дене палдарен. Каласен кодена: 27-30 сентябрьыште Сыктывкарыште Российыште илыше финн-угор калык-влакын VI погынжо эрта. Погыныш марий калык лӱм дене 27 делегат да 18 эскерыше каен кертыт. Тышечын Марий Эл гыч — 9 делегат ден 7 эскерыше, Башкортостан гыч – 5 делегат ден 3 эскерыше, Удмуртий гыч — 2 ден 1, Виче / Киров кундем гыч – 3 делегат ден 2 эскерыше; моло регионла гыч – Коми, Парма / Пермь, Югра, Тюмень, Татарстан, Волгоград, Моско, Угарман — ик делегат ден ик эскерыше дене лийын кертыт. Тыгай квотым АФУН-ын вуйверже пеҥгыдемден.

Тыге Марий Мер Каҥаш кеҥежым шуктымо пашажым иктешлен.

Йошкар Аку