2015 ий 30 сентябрьыште Мер Каҥаш вуйверын погынымашыже эртыш. Ятыр йодышым каҥашышт. Ты гана погынымашке Татарстан кундем гыч мер пашаеҥ-влак ушнышт: Мер Каҥаш еҥ, Татарстанысе марий-влакын калыкле-тÿвыра автономийыштым вуйлатыше Олег Третьяков ден ты автономийын еҥже Владимир Максютов.

Пашаче вашлиймаште эн ончычак Марий форумым, шыже сессийым да Пленумын погынымашыжым ямдылыме да эртарыме йодышым нöлтылме. Тыге Форум ден Пленумым 6 ноябрьыште эртараш палемдыме.

Погынымаш годымак Йошкар-Оласе Мер Каҥаш активын пашаж шотышто ты пöлкалан вуйын шогышо Наталья Пушина каласкалыш.

Марий мер толкын-влак дене вашкылым кучымо да ты сомылым пеҥгыдемдыме паша дене икымше оналмаш Валерий  Мочаев палдарыш.

Тунамак нылымше кварталлан паша кышкарым пеҥгыдемдышт, Илалше-влакым саламлыме сомылым шукташ палемдышт.

Тыгак Мер Каҥаш вуйвер исполкомыш эше ик еҥым пуртышт. Тиде – М.Шкетан лÿмеш Марий кугыжаныш драме театрын у директоржо Михаил Матвеевым. Ынде исполкымшто куд еҥ уло.

Саламлымаш-влакат лийыч. Теве «Марий сандалык – Марийский мир» журнал «СМИротворец» журналист конкурсышто Юл кундем кÿкшытыштö кумшо верыш лектын. Самырык-влак Алёна Иванова ден Эльвира Куклина Россий кÿкшытыштö коммерческий огыл организаций ден мер толкын-влакын лидерышт-влаклан конкурсышто сеҥеныт.