28-29 ноябрьыште Йошкар-Олаште Мер Каҥаш «Марий форум: шыже сессийым» эртара. Тидын нерген 21 октябрьыште чолга еҥ-влак Мер Каҥаш Вуйвер погынымаште ойленыт.

Черетан Марий форум годым икымше кечын Марий-влакын федерал калык-тӱвыра автономийыштым пеҥгыдемдыме шотышто конференций лиеш. Тыгак ото-влакым аралыме да у кумалме верым почмо шотышто йодышым нӧлталыт.
Мер Каҥаш ден марий активын еҥышт ончыкылык пашашт нерген мутланаш тӱҥалыт. Вара «Пермские марийцы» книга презентаций лиеш, а кастене М.Шкетан лӱмеш Марий кугыжаныш драме театрын лӱмгече концертшым ончат.
Марий форумын кокымшо кечынже Мер Каҥаш кудымшо пленумын погынымашыже лиеш. Тиде жапыштак «Калык тӱвырам вияҥдымаште самырыктукымын ончалтышыже» теме дене мутланымашым палемдыме.
Марий Эл ден марий-влак тӱшкан илыме регионла коклаште вашкелшык шотышто йодышым каҥашаш шонат. Мер Каҥашын икмыняр еҥже верлаште ворандарыме пашашт дене палдарат.

Автор: Эльвира Куклина.