Мер Каҥаш да чолга еҥ-влак Марий форумын шыже сессийышкыже 2015 ий 6 ноябрьыште Оршанке посёлкышто чумыргеныт.

Форумыш Марий Эл Республикысе тÿвыра, печать да калык-влакын пашашт шотышто министрын алмаштышыже Галина Ширяева, ты министерствыште пöлкам вуйлатыше Игорь Садовин ушненыт.

Кӱжгö пашам тӱҥалме деч ончыч форумыш толшо-влак Оршанге посёлкысо кресаньык илыш тоштер дене палыме лийыныт.

Форум тӱҥалтыште уна-влакым Оршанге районым вуйлатыше Александр Плотников саламлен. Тудо верысе паша дене кӱчыкын палдарен.

Тыге Мер Каҥашын кандашымше пленумжын погынымашыже эртен. Тыште Марий калыкын X Погынжым погымо да эртарыме нерген каҥашеныт. Погыным 2016 ий 14-16 апрельыште эртараш кутырен келшеныт.
Тыгак Погыным чумырымо да тудым эртарыме сомыл радам-влакым пеҥгыдемденыт. Делегат-влакым сайлыме жапат рашемын: 2015 ий ноябрь гыч 2016 ий февраль йотке.

Пленум деч вара йыргешке ӱстел лийын. Кок йодышым каҥашеныт. «Марий ял: Оршанге районысо паша шынык» да «Улшо ото-влакым аралыме да у кумалме верым почмо паша шотышто». Шке шонымашыштым Марий Элысе тӱҥ онаеҥ Александр Таныгин, Оршанке районысо администраций главан алмаштышыже Лидия Протасова, районысо туныктыш пöлкан марий йылмым ден литературым туныктымо шотышто методистше Галина Тоймакова, районысо тӱвыра пöлкан специалистше Елена Матвеева, Оршанке колледжын студентше Максим Алгайкин, Мер Каҥашын еҥже, «Пу вий» ушемым вуйлатыше Виталий Кудрявцев ойленыт.

Чыла йодышым ончен лекмеке, «Кугу маска ава» сонарзе верым, Тошто Крешын ялысе Шкетан лӱмеш тоштерым ончен савырненыт. Тошто Крешын ялысе клубышто верысе артист-влакын концертыштым онченыт. «Полто» марий калык кочкышым авызленыт.

Марий форум, шыже сессий мучашлалтыныт, ынде Марий калыкын X Погынжо шотышто сомыл-влакым ворандараш кыртмен пижме.

Автор: Эльвира Куклина.