2017 ий идым тылзын 6-шо кечынже Провой вел Какшамарий школын ончычсо директоржо Осипов Фёдор Петрович лӱмеш шарнымаш оҥам почмо.

Фёдор Петрович Виче кундемыште шочын, Озаҥысе гимназийым, Озаҥ университетын историй да филологий факультетшым «визытанлан» тунем лектын да Какшамарий школышко толын. Тыште 1922 ий гыч 1937 ий марте директорлан пашам ыштен. Осиповым «Марий Макаренко» манын лӱмденыт. Погымо опытшо дене Марий областьысе моло школласе городок-влакым палдарен. 1929 ийыште школышто районлан тракторист-влакым ямдылыме курсым почмо. А 1931 ийыште школым агропедтехникумыш савырыме.

Ты шарнымаш кечыш Марий Эл Республикысе тӱвыра, печать да калык-влакын пашашт шотышто минстрын алмаштышыже Ширяева Галина Стеановна, Оньыжа Александров Эдуард Васильевич, историй науко кандидат Попов Никандр Семёнович, Звенигово районысо тӱвыра пӧлкам вуйлатыше, Мер Каҥашын еҥже Михайлова Лидия Аркадьевна толыныт. Митингым школын библиотекарьже Малыгина Галина Николаевна ден Юлъял тӱвыра пӧртын вуйлатышыже Мартынов Анатолий Григорьевич вӱденыт.

Осипов Фёдор Петрович тӱрлӧ могырым шке шинчымашым келгемдыше педагог лийын. Тудо немыч, грек, француз, латин йылмылам пален. Школышто пашам ыштымыж годым марий йылмым сайын тунемын. Тыгак ялозанлык науко-влакым пален налын, кок гектар мландыште тӱрлӧ пашам шуктен, школышто городокым почын. Тудо шкежак агроном пашалан тунемын. Участкыште опытым ышташ тӱрлӧ ялозанлык культурын тӱрлӧ сортшым налын, а фермылан – породан чывым, лудым, кроликым. Фёдор Петровичын вуйлатымыж почеш тӱрлӧ сорт шурным, пурсан культурым шочыктеныт. Тыгай школ директор дене уло республикна кугешнышаш. Тидым шотыш налын, самырык тукымлан чапланыше земляк-влакым пален илаш манын, Какшамарий школ ден верысе калык ятыр сомылым шуктат.

Школ Ключников-Палантайын лӱмжым нумалеш, а тоштер – ончычсо уста туныктышо ден завуч Кутасов Евгений Леонидовичын. Ынде школ пырдыжысе шарнымаш оҥаште Осипов Фёдор Петровичын лӱмжӧ композитор-влак Эшпай Яков Андреевич ден Ключников-Палантай Иван Степанович, Совет Ушемын Геройжо Кологривов Михаил Михайлович дене пырля волгалтеш. Ты кечынак школ пакчаште Осипов лӱмеш олмапум шындышт. Какшамарий вел калык ӱшана: ондакысе директор лӱмеш шындыме пушеҥге одарланен кушкеш да озаж семынак саскаж дене куандара.