Пагалыме марий калык!

Мер Каҥаш лӱм дене чыландамат алал кумылын шушаш У 2014 ий дене саламлем!

Ончыко у ошкылым ыштыме деч ончыч калыкыште ожнысек шеҥгеке савырнен ончалыт. Эртыше ийым ончалаш гын, ятыр кугу паша коеш. Нунын кокла гыч иктыже — Финн-угор калык-влакын V погынышт. Тушто моло финн-угор калык-влак дене пырля марий калыкнан илышыжымат сай могырыш вашталтыме шотышто ятыр йодышым каҥашыме да ончыкылан корным палемдыме. Тудым илышыш пуртымаш – мемнан кидыште. Кузерак чулымлыкым ончыкташ тӱҥалына – тугеак илышна ворана.

Тек у 2014 ийыште кажне кече тыланда нимучашдыме чолгалыкым да пиалым конда, чондам ласка кумыл рӱпша да кажне волгыдо шонымашдам шуктен толеш. Ончыкыжымат марий калыкнан да Марий Элын волгыдо ончыкылыкшо верч уло вий дене тыршаш ÿжам. Тек шочмо йылмына, марий тӱвырана да кугезе йӱлана калыкнан чоныштыжо сескемалт йÿлат да марий улмына дене кугешнаш таратат.

У ийыште чылаландат пеҥгыде тазалыкым, кужу ӱмырым, вашла пагалымашым да пиалым тыланем. Тек 2014 ий кажне ешыш улан да волгыдо илышым, чон ласкалыкым конда.

У ий дене!

Марий Оньыжа,
Марий Эл Кугыжаныш Погын вуйлатышын алмаштышыже Анатолий Иванов.