Ура! «Марийский мир — Марий сандалык» журнал «Российын вич эн сай этноизданий-2019» радамыште. Журналын тӱҥ редакторжо Валерий Александрович Мочаевым да тудын командыжым шокшын саламлена!

Конкурсым Калыкысе тӱшка увер йӧн ассоциаций / Ассоциация национальных СМИ эртарен. Тений конкурсыш 16 регион гыч 51 заявке пурен. Идым тылзын 24-ше кечынже Сочи олаште эртаралтше «Вся Россия-2019» кызытсе/современный журналистике форумышто сеҥыше-влакым саламлаш тӱҥалыт. Теве сеҥыше-влакын тӱрыс списокышт:

«Пять лучших этнических изданий России-2019» конкурсышто сеҥыше-влак:

Эн сай районысо газет. «Үлэ күүһэ” газет, Саха Республикысе (Якутий) Горный улус (тӱҥ редактор В.И.Алексеев).

Эн сай газет. «Удмурт дунне» газет («Удмуртский мир»), Одо кундем (тӱҥ редактор З.К. Рябинина).

Эн сай журнал. «Башкортостан кызы» журнал («Дочь Башкортостана»), Пошкырт кундем (тӱҥ редактор Г.М. Кутуева).

Эн сай йоча изданий. «Сабантуй.РТ» журнал, Татарстан (тӱҥ редактор И.Ф. Фазуллин).

Эн сай сылнымутан изданий. «Кипиня» журнал, Карелий (тӱҥ редактор Я.Н. Филимонкова).

2-шо степенян диплом дене палемдалтше-влак:  

Эн сай районысо газет. «Үөһээ Бүлүү» газет, Саха Республикысе (Якутий) Верхневилюйский улус (тӱҥ редактор С.М. Иванов).

Эн сай газет. «Башкортостан» газет, Пошкырт (тӱҥ редактор В.Г. Исхаков).

Эн сай журнал. «Байанай» журнал, Саха Республике (Якутий).

Эн сай йоча изданий. «Аманат» журнал, Пошкырт.

Эн сай сылнымутан изданий.  “Күрүлгэн» журнал, Саха Республике (Якутий) (тӱҥ редактор А.Г.Гуринов).

3-шо степенян диплом дене палемдалтше-влак:  

Эн сай районысо газет. «Хезмэт» газет, Татарстан (тӱҥ редактор В.М. Закиев).

Эн сай газет. «Хабар» газет, Хакасий Республике (тӱҥ редактор Р.Д. Сунчугашев).

Эн сай журнал. «Марий сандалык» журнал, Марий Эл Республике (тӱҥ редактор В.А. Мочаев).

Эн сай йоча изданий. «Байр» журнал, Калмыкий Республике (тӱҥ редактор Б.А. Мукебенова).

Эн сай сылнымутан изданий. «Чолбон», Саха Республике (Якутий) (тӱҥ редактор Д.Н.Макеев).

Ушештарена, 2018 ийыште «Марийский мир – Марий сандалык» журналын авторжо Сергей Шанчара (Щеглов Сергей Африканович) российысе «СМИротворец» конкурсышто кумшо верым налын ыле. Угарман марий-влак нерген очеркше чапле лийын.

Мемнан салам шомаклан В. А. Мочаев тыге вашештыш: «Тиде конкурслан ме нимогай посна пашам ямдылен огынал. Журналын задачыжым умылтарен, 2017-2019 ийласе номер-влакым колтышна. Тидыже ситен. Жюри мыланна нимомат умылтарен огыл, молан ме кумшо верыш логалын улына. Идым/сентябрь тылзын 24-ше кечын Сочи олаш форумыш мияш ӱжыныт. Мемнан вашмут тыгае лие: «Наградылан тау, тудым налаш кошташ оксана уке. Мыланна кугыжа окса Урал да Юл кундемысе марий-влак дек кошташ веле ойыралтеш». Мыйын шонымаште, жюри мемнан журналын ойыртемжым шотыш налын: кок йылме дене – марла да рушла возена; очерк жанрым пагалена – тудо кызыт журналистикыште шагал улеш; шукыракше Марий Эл деч ӧрдыжтӧ илыше марий-влакым ончыктена. Журнал йыр шотан, шымлен моштышто автор-влакым погаш тыршена: Ксенофонт Сануков (кызыт возымым чарнен, шоҥго), Вячеслав Громов, Александр Акшиков, Евгений Кузьмин, Сергей Свечников, Зоя Дудина, Лидия Семёнова, Валерий Кузьминых, Владимир Кашков да тулеч молат. Тора кундемла гыч мемнан деке возен шогат Миклай Морохин (Угарман), Руслан Бушков (Татарстан), Александр Петрушин (Виче), Валерий Бакетов (Урал), Вячеслав Четкарёв (Питер) да молат. Мемнан кашакыште (бригадыште), кудыжо Россий мучко коштеш, чолга фотограф Денис Речкин уло. Пашам кумылын ыштена. Тений кум номерым ямдылена гын, 2020 ийлан Марий Элысе тӱвыра, савыктыш да калык паша шотышто министерстве ныл номерым лукташ йодын. Кошташ-возаш-лукташ эре ямде улына!».

Мария Кузнецова.