2015 ий 3 июльышто мемнан деч кайыш Юрий Петрович Русанов, М.Шкетан лӱмеш Марий кугыжаныш драме театрын директоржо, поэт, журналист, чолга марий мер пашаеҥ — Мер Каҥаш вуйлатышын, Марий Оньыжан алмаштышыже, Марий калык конгрессын еҥже. Моткоч кугу йомдарымаш. Уло марий калык лÿм дене Марий Оньыжа, Мер Каҥашын еҥже-влак пырля пашам ыштышыже, родо-тукымжо, лишыл еҥже, пелашыже, йочаж-влаклан чаманымашым каласа.  

Юрий Петрович Русанов дене чеверласымаш рушарнян, 5 июльышто, 9 шагатлан М.Шкетана лÿмеш театр ончылно (Йошкар-Ола) лиеш.

РУСАНОВ ЮРИЙ ПЕТРОВИЧ, Марий Эл Республик культурын сулло пашаеҥже (2009). 2007 ий гыч – М. Шкетан лӱмеш Марий кугыжаныш драме театрын директоржо.

1968 ий 15 майыште Марий Эл Республике Морко район Нурумбал ялыште шочын. 1985 ийыште Морко районысо Зеленогорск кыдалаш школым, 1992 ийыште – Марий кугыжаныш университетын историй-филологий факультетшым, 2005 ийыште «Кугыжаныш да муниципальный вуйлатымаш» специальность дене Марий кугыжаныш технический университетын уэш ямдылыме курсшым (квалификацийже – менеджер) тунем пытарен.

Почеламутым возен, 1993 ийыште «Лышташ йӱр» лӱман почеламут сборникым савыктен луктын.

1998 ийыште Ю.П. Русановлан литература ден искусствышто «Литература – журналистика» номинаций дене Олык Ипай лӱмеш Кугыжаныш молодёжь премийын лауреатше лӱмым пуымо. Национальный радиовещанийым вияҥдымашке кугу надырым пыштымыжлан 2001 ийыште «Марий Эл» ГТРК» федеральный кугыжаныш унитарный предприятийын Почётан грамотыж дене палемдыме.

2002 ий май гыч 2007 ий октябрь марте Русанов Ю.П. М. Шкетан лӱмеш Марий кугыжаныш драме театр директорын Марий самырык театр шотышто алмаштышыжлан пашам ыштен.

Культурым да республикыште национальный радиовещанийым вияҥдымашке надырым пыштымыжлан 2006 ий августышто Русанов Ю.П. Марий Эл Правительствын Почётан грамотыж дене палемдалтын.

2007 ий октябрь гыч М. Шкетан лӱмеш Марий кугыжаныш драме театрын директоржылан тыршен.

Культурышто тыршен пашам ыштымыжлан 2008 ий мартыште Марий Эл Республикын культура, печать да калык-влакын пашашт шотышто министерствыжын Почётан грамотыж дене палемдалтын.

2008 ий март гыч Мер Каҥаш вуйлатышын алмаштышыже. 2009 ий январь гыч Марий Эл Республикын Общественный палатыжын членже. 2009 ийыште Ю.П. Русановлан «Марий Эл Республик культурын сулло пашаеҥже» почётан лӱмым пуымо.