30 октябрьыште Оршанке районышто «Илаш, пашам ышташ!» Яков Павлович Майоров-Шкетанын шочмыжлан 115 ий темме лӱмеш пайрем эртен. Калык ончыч Оршанке посёлкысо памятник воктене чумырген, вара кумылан-влак Кугунур селаш кудалыныт. Тушто «М.Шкетаным порын шарнена» Шкетан лудмаш, «115» писын куржмо марофон лийыныт, а уна-влакым школ тоштер дене палдареныт, да Марий театр концерт дене куандарен.

Тиде жапыштак Тошто Крешын ялыште верланыше тоштер пӧртыштӧ шарнымаш сортам чӱктеныт. Тушко Майоров тукым погынен. Кугунур гыч куржшо спортсмен-влакымат тӱвыра пӧрт ончылно вашлийыныт. Пайрем мыскара кас да концерт дене мучашлалтын. Чыла тидым эртарымашке кугу надырым Мер Каҥашын Оршанке районысо пӧлкажым вуйлатыше, амалкалче, кидмастар Виталий Кудрявцев пыштен. Чаманен каласаш логалеш, таче Тошто Крешын тӱвыра пӧртыштӧ вуйлатыше уке. А Виталий Николаевич шке вийже дене ятыр сай пашам шуктен шога – теве 1926 ийыште чоҥымо пӧртым налын, а тиде пӧртыштӧ Шкетан калыкым поген, да пырля колхозым чоҥымо нерген мутланеныт. Ынде тыште – кидмастар-влакын мастрскойышт.

Тиде пайремыш саламлаш Йошкар-Ола гыч делегаций миен: Марий Элысе тӱвыра, печать да калык-влак паша шотышто министрын алмаштышыже Галина Ширяева, «Марий Эл» газетын журналистше, поэтесса Зоя Глушкова (Дудина), «Ямде лий» газетын тӱҥ редакторжо Лидия Семёнова.

Кузе палемден калык туныктышо П.Е.Емельчнов, «Яков Павлович Майоров-Шкетан – марий сылнымутлан негызым пыштыше кокла гыч иктыже. Тудо тале мер пашаеҥ, журналист, драматург, прозаик, литературовед да поэт лийын. Латшым ий жапыште (1920-1937) 14 пьесым, 100 наре ойлымаш ден очеркым, 10 наре почеламутым, ятыр статьям да «Эреҥер» романым возен. Но тудын тӱҥ литератур творчествыже драматургий да прозо дене кушкын».

Автор: Эльвира Куклина.