1 ноябрьыште Морко посёлкышто Мер Каҥашыже шыже сессийже – Российысе марий форум почылтын. Чылаже 170 наре еҥ Марий Элын тӱрлӧ районжо, Башкортостан, Киров, Татарстан, Пермь, Тюмень, Ленинград, Свердловск, Удмурт кундемла чумыргеныт. Тыгак пырляшке Морко район гыч мер кучем, школ, тӱвыра пашаеҥ-влак ушненыт.

Форумын еҥже ден унаже-влакым Марий Эл тӱвыра, печать да калык-влак паша шотышто министрын алмаштышыже Галина Ширяева, Морко район да Район депутат собранийым вуйлатыше Светлана Иванова саламленыт.

Тиде кечын Российысе финн-угор калык-влакын V Погыныштын лектышыже дене кылдалтше мер каҥашымаш эртен. Марий калыкын финн-угор тӱняште верже нерген Валерий Мочаев докладыштыже ойлен. Тудо палемден: финн-угор калык моткоч тошто калык, сандене южо у паша шотышто вияҥаш нелырак. Марий калык чот шот дене 2010 перепись почеш Российысе финн-угор калык коклаште кумшо верыште шога. Ончылно- мордва ден одо. Марийын тӱвыраже, мер илышыже вияҥыт, но ятыр историй йодыш вараш кодеш — шымлызе-влак тачат каласен огыт керт марий калыкын ийготшым.

Мер каҥашымаш годым ятыр темлымаш пурыш.Мутлан, марий йылме дене электрон учебник-влакым писынрак лукташ; школ программыш марий йылме дене ЕГЭм пурташ; верысе минобразованийыш марий йылмым туныктышо-влакым шуарыше курсым ышташ темлымаш дене лекташ; Мер Каҥашын еҥже-влаклан яллашкетӱшкан лектын кошташ, марий газет-влакымат шаркалаш полшаш.

Тиддеч вара Мер Каҥаш активын идалыкаш погынымашыже-влакым эртарыме шотышто «йыргешке ӱстел» эртыш. Чаманаш логалеш, Мер Каҥаш самырык-влакын «шокшо пӱкенышт» ышт лий — ӱдыр-рвезе-влак шагал погыненыт.