Тыгаяк теме дене 2017 ий теле (декабрь) тылзын 20 кечынже Моркысо тӱвыра полатыште «йыргешке ӱстел» йыр кутырымаш лийын. Тудым Мер Каҥашын Моркысо пӧлкажым вуйлатыше Титов Анатолий Анатольевич эртарен.

Ты оҥай да пайдале мутланымашке Морко район администраций вуйлатыше Иванов Александр Альбертович, районысо депутат-влак погын председатель Иванова Светлана Михайловна , Оньыжа Александров Эдуард Васильевич, Мер Каҥашын исполкомжым вуйлатыше Иванов Виктор Иванович, «Передовик» ялозанлык предприятий вуйлатыше Игнатьев Юрий Арсентьевич, районысо самырык парламент председатель Васильев Алексей, туныктышо, тӱвыра пашаеҥ, самырык-влак ушненыт. Погынышо-влак мер пашан илышыште айлыме вержым лончыленыт, тудын гочын калыкнан шкешамжым нӧлталме да моло нергенат кутыреныт.

Иктешлымеке пале лийын: тӱрлӧ пашам шукташ самырык ӱдыр-рвезе-влакым проектым возаш туныктыман. Тыгак район кӱкшытан самырык тукым слётымат эртарыман. Лишыл паша семын палемдыме: толшаш ийын январь мучаш марте чыла организацийын, предприятийын, учрежденийын, корнысо пале да урем лӱм-влакын чын марла возалтмыштым терген лекташ. Йоҥылыш возалтше уло гын, тудым тӧрлатыме шотышто район администрацийыш серышым возаш кӱштымӧ. Тыгак Марий талешке кечылан пӧлеклалтше этнодиктантым возаш. Тудым ямдылаш да сайын эртарен колташ районысо туныктыш пӧлка дечын йодаш.

Погынышо-влак тыгай форматан погынымашын да вашла ужын мутланымашын кӱлешлыкшым пеҥгыдемденыт да ончыкыжымат эртараш кутырен келшеныт.

Т.ИВАНОВ.

Снимкыште: «Йыргешке ӱстел» йыр кутырымаш годым.