Марий кундемыштына фагот дене шоктен моштышо еҥым парня дене шотлаш лиеш. Нунын коклаште ик уста музыкант — Дмитриев Юрий Васильевич – 2018 ий шорыкйол (январь) тылзын 3-шо кечынже шочмо кечыжым палемден.

Дмитриев Юрий Васильевич Морко район Папанин / Папанино ялеш 1949 ий 3 январьыште шочын. 1974 ийыште Йошкар-Оласе музыкальный училищым «Преподаватель ДМШ. Артист оркестра. Руководитель самодеятельного духового оркестра» специальность дене тунем лектын. А специализацийже — фагот семӱзгар. Тунем лекмыж деч вара Юрий Васильевичым Марий музыкальный театрысе (вара тудо Э.Сапаев лӱмеш опер да балет Марий кугыжаныш театр маналташ тӱҥалын) симфонический оркестрыш налыныт. 1984 ийыште Озаҥысе Н.Г.Жиганов лӱмеш кугыжаныш консерваторийым тунем лектын. Дипломыштыжо специальностьшо тыгерак возалтын: «Концертный исполнитель. Солист оркестра. Преподаватель».

Армий радамыште 1968-1970 ийлаште служитлен. Оркестрыште 2008 ий марте фагот дене шоктен. Чаплын шоктен. 2000 ийыште Марий Элын сулло артистше лӱмым сулен. Эшеат пашам ышта ыле, но нелын черланымылан кӧра паша гыч каяш верештын. Кызыт I группо инвалид.

Пелашыже, Александра Алексеевна, У Торъял район Тушнур Купсолаште / Cредний Тушнур ялыште шочын-кушкын. Но 12 ияш гыч У Торъялысе интернат-пӧртыштӧ илен. 10 класс деч вара пашам ышташ тӱҥалын. Э.Сапаев лӱмеш опер да балет театрыште кумло ий тыршен: костюмерлан, кассирлан, моло сомылымат шуктен. Кызыт — М.Шкетан лӱмеш театрын вахтыштыже.

Дмитриевмыт кок ӱдырым ончен куштеныт. Кугуракше, Любовь, Э.Сапаев лӱмеш опер да балет театрыште 20 ий пашам ыштен. Пытартыш жапыште парикмахерский цехшым вуйлатен. Но 2011 ийыште ӱмыржӧ кӱрылтын. Изиракше, Татьяна, «Евросеть» кевытыште пашам ышта. Ныл уныкашт уло.