Мер Каҥаш вуйвер погынымаште икмыняр тӱҥ йодышым каҥашыме.

Тӱҥалтыштак Марий Элысе Кугыжаныш Погын вуйлатышын пресс-секретарьже Александр Петровлан Республикысе тӱвыра министерствын Таумутшым Михаил Васютин (вуйверын еҥже, республикысе тӱвыра, печать да калык-влак паша шотышто министр) кучыктыш. Таумут Регион-влак кокласе «Пеледыш пайрем» годым «Кудо» конкурсым шот дене виктарен колтымылан.

Погынымашке тӱвыра министрын алмаштыже Галина Ширяева толын. Тудо 3-4 сентябрьыште Петрозаводскышто эртышаш Финн-угор калык-влакын тӱнямбал конференцийышт нерген мутым нӧлтале. Тыге конференцийыш марий калык деч Галина Ширяева, Алёна Иванова, Фёдор Галкин (Марий Эл), Александр Гайсин (Пошкырт кундем) кайышаш улыт. Тунам кок секций пашам ышташ тӱҥалеш да ик кечынже марий калык нерген кок фильмым ончыкташ шонат: Алёна Иванован «Юмын пӧлекше» да Тамара Пакееван «Азам икымше гана мушмаш».

Вуйвер погынымаште Мер Каҥашын еҥже, Одо кундемысе марий самырыктукымын «Ӱжара» ушемыштым вуйлатыше Виктория Папаеван колтымо докладшым каҥашыме.  Викториян мер пашажым сайлан шотлымо да шыже форумышко тӱрлӧ кундемыште илыше самырыктукымын йодышыжым, пашажым каҥашаш лукташ палемдыме.

А «Марий сандалык» журнал нерген ойлымо годым тудын «чурийже» — ончыл лаштык – нерген сайынрак шоналташ тыланымаш пурен. Палемдыман, таче журналым Российын кандаш регионыштыжо, Моско ден Санкт-Петербург олалаште да кундемлаште, Юграште налыт. Савыктыш тӱҥ шотышто Марий Элысе илыш да Россий мучко шарлыше марий калык нерген каласкала. Ончыл верым историй да мер илыш дене кылдалтше теме налеш. 2012 ий гыч «Марий сандалыкым» интернетыштат лудаш лиеш, «Саскавий» у блок шочын, редколлегий вашталтын – шукырак мер пашаеҥ-влак ушненыт.

А кумшо йодыш почеш, Шинчымаш кечын Мер Каҥашын еҥже-влаклан школлашке лекташ, йӧн лийме семын шочмо школыш миен толаш, тунемше да туныктышо-влак дене вашлийын мутланаш пунчалыныт. Тений тунемме идалыкын икымше урокшо изи годсек лишыл шочмо-кушмо вер-шӧр темылан пӧлеклалтеш. Эше икте куандара: туныктышо-влакын конференцийлаштышт педвоспитанийыште этнокультурын верже нерген утларак да утларак мутланат.

Автор: Эльвира Куклина.