1924 ий сорла тылзын 28-ше кечынже — Морко муниципал районын, пӱрымашнам чоҥаш полшышо кундемын, шочмо кечыже. Тиде кечын, чынак, кажне еҥын чоныштыжотыгай кумыл озалана: ме кугу да икоян ешын ужашыже улына да, пырля келшен, икте-весылан полшен илен, пашанат утларак воранен толеш, илышнат чотрак тӱзлана.

90 ий — кумда историй дене таҥастараш гын, пеҥгыдын ошкылаш тӱҥалме тат гына. Но ты жапыште шуко сай пашам илышыш шыҥдарыме, Марий Элын экономикыжым, социальный ден тӱвыра аланжым вияҥдымашке кугу надырым пыштыме.

Мутат уке, районын ик эн кугу поянлыкше — калык, тыште шочшо-кушшо да кундемнам, пӱтынь элнам чапландарыше, тыгак таче тыште илыше, пашам ыштыше, эртык корным возышо еҥ-влак. Нунын надырыштым аклаш неле, вет нунын пашашт эреак пример лийын кодеш.

Морко мланде уста деч уста еҥым ончен куштен, кугу илыш корныш луктын. Тачат тыште илаш, пашам ышташ, шӱм-чон дене каналташ чыла йӧн уло. Район кажне кечын пелед да тӱзланен толеш. Тудын шкенжын сынже уло, моло вер-шӧр деч пӱртӱс денат, кумыл денат, сомыл денат палынак ойыртемалтеш. Умбакыжат 90 ий жапыште погымо поянлыкым арален кодаш да у паша дене элнам куандараш тыланем.

Шергакан землякем-влак, районын илышыжым ворандарен колтымашке мондалдыме надырым пыштымыланда кугу тау! Тек кажне ешыште пиал да келшемаш озаланат, тазалыкда тумо гаяк пеҥгыде, кумылда пора да эреак нӧлтшӧ лийыт. Тек кундемыштына чолга деч чолга еҥ-влак кушкыт. А мемнан йӧратыме морко мландына поян, сымыстарыше лиеш да шӱм-чоннам кеч-могай татыштат рӱпша, виян да кугу куатан лияш полша.

Пайрем дене!

Пагален, Марий Оньыжа Анатолий Иванов.